ཉི་མ་ལ་ཁའི་བོད།

རི་ལུང་རྩྭ་ཐང་རྒྱ་ལམ་དང་ལྕགས་དྲས་ཁེངས།།
མཚོ་དང་ཆུ་བོ་འབག་བཙོག་བ་ཚྭས་ཁྱབ།།
གཡང་ཟོག་ཕྱུགས་ལ་ནད་ཀྱི་ཁོད་ཁ་མང་།།
བོད་འབངས་འབྲོག་པའི་འཚོ་བ་སྟོང་ལ་ཉེ།།

ཡངས་པའི་རོང་ས་རྒྱ་ཁང་གྲུ་བཞིས་ཁེངས།།
ཞིང་ཁའི་བར་ཚིགས་གད་སྙིགས་ཤོག་བུས་བཟུང༌།།
འབྲུ་དྲུག་སྙེ་མ་ལང་ཚོ་གཞོན་དུས་རྒུད།།
བོད་འབངས་རོང་བར་སྟོན་ལས་མེད་ལ་ཉེ།།

བོད་མི་ཕལ་ཆེར་དེང་རབས་འཕྲུལ་གྱིས་བསླུས།།
བོད་ཕྲུག་ལོ་གཞོན་མེས་པོའི་སྲོལ་ལ་སྡང༌།།
བོད་རིགས་བུ་མོ་ལང་ཚོ་བཙོང་མཁན་མང༌།།
གངས་ཅན་བོད་པའི་ངོ་སོ་ཉམ་རེ་ང༌།།

སྦྲ་ནག་གྲུ་བཞིའི་ཁྱིམ་ལས་གློག་ལ་བརྟེན།།
གཡང་ཟོག་ཕྱུགས་ཀྱི་རྗེས་ལ་སྦག་སྦག་ཞོན།།
ཁྱིམ་གྱི་ལོ་ལོན་རྒན་རྒོན་རྒྱ་ལྭ་གྱོན།།
བོད་མིའི་རྒྱུན་སྲོལ་བཟང་པོ་ཉམས་ལ་ཁད།།

བོད་པའི་ཐོབ་ཐང་གླེང་ན་ཁ་བྲལ་བ།།
ཕྱི་ཁ་ནང་ལག་བྱས་ན་གོ་ས་ཐོབ།།
རང་རིགས་རང་གིས་སྨད་ན་ཏང་ཡོན་པ།།
བོད་མིའི་གནས་སྟངས་ཚེར་མགོའི་བྱེའུ་ཆུང་འདྲ།།

བླ་མ་སྐྱེ་སྤྲུལ་ཚོགས་པའི་ཚོང་ལ་ཞུགས།།
གྲྭ་བཙུན་རྒྱུ་ཡི་དོན་དུ་རྒྱ་གྲོང་ཉུལ།།
བོད་མི་ཕལ་ཆེར་ལྷ་ལ་དད་པ་ལོག།
དེང་སྐབས་བོད་འདི་གྲོག་མའི་ཚང་དང་འདྲ།།

ཁ་བདེ་དཔོན་པོས་མིང་དང་ཁེ་གྲགས་གཉེར།།
ཁོག་འཁྱོག་མཁས་པས་ཐོབ་དང་བསྙེན་བཀུར་བསམ།།
ཅང་མེད་འབངས་མིའི་དཀའ་སྡུག་རྟོགས་མཁན་མེད།།
བོད་པའི་ལས་སྐལ་ལ་ཁའི་ཉི་མ་འདྲ།།

འགར་ཚེ་རྒྱལ།