འོད་སྟོང་འབར་བའི་ལེའུ་གསུམ།

ཚྭ་རུ་མ་ཐབས་མཁས་ཀྱིས་བྲིས།

དང་པོ། གངས་ཅན་རྒྱལ་གཅེས་པའི་ལེའུ།

གངས་ཅན་སྐྱེ་རྒུའི་ཡོངས་ཀྱི།།
མེ་ཏོག་ཕོག་པའི་ལྷ་སྐལ།།
༧རྒྱལ་དབང་བསྟན་འཛིན་རྒྱ་མཚོར།།
སྐྱབས་གསོལ་སྙིང་ནས་འདུད་དོ།།

གངས་ཅན་བསྟན་སྲིད་སླད་དུ།།
སྐྱིད་སྡུག་མཉམ་མྱོང་བྱེད་པའི།།
འཆི་ཕོད་རྒྱལ་གཅེས་དཔའ་བོ།།
དཔའ་མོའི་ལེ་འུ་འདིར་འབྲི།།

༡༽བཙན་པོའི་སྙིང་སྟོབས་མངའ་བའི།།
གངས་ལྗོངས་དཔའ་བོའི་དེད་དཔོན།
།རང་ལུས་མེ་རུ་བསྒྲོན་པའི།།
སྲོལ་འབྱེད་བཀྲ་བྷེ་ཁོང་ཡིན།།

༢༽གངས་ཅན་འགྲོ་བའི་མགོན་པོ།།
གངས་རིའི་ལྗོངས་སུ་འབོད་པའི།།
གངས་ཅན་རྒྱལ་གཅེས་དཔའ་བོ།།
གངས་བུ་ཕུན་ཚོགས་མཆོག་རེད།།

༣༽མེས་པོའི་ལ་རྒྱའི་ཁུ་ཚུར།།
དཔའ་སྙིང་སྟོབས་ཀྱིས་བསྒྲེངས་ནས།།
མདོ་སྟོད་དཔའ་བོའི་དང་རྩེ།
།ཚེ་དབང་ནོར་བུ་ཁོང་ཡིན།།

༤༽དགུ་འགྱུར་སེམས་ཀྱི་དཔའ་སྙིང་།།
གཞན་དོན་སྟོབས་ཀྱིས་འདེགས་པའི།།
རྔ་ལྗོངས་སྟག་མོ་རྫོང་གི།
སྟག་ཕྲུག་བློ་བཟང་དཀོན་མཆོག།

༥༽གཞན་ཕན་སེམས་དཔའི་སྙིང་བརྩེ།།
གངས་ཅན་བོད་ལ་སྤྲོ་ཕྱིར།།
མེ་དཔུང་གོས་སུ་གྱོན་པའི།།
དཔའ་བོ་བློ་བཟང་བསྐལ་བཟང་།།

༦༽འཛམ་གླིང་མི་སྡེའི་ཐོབ་ཐང་།།
བོད་ལ་མེད་པའི་བདེན་དཔང་།།
གཅེས་པའི་སྲོག་གིས་སྒྲོག་མཁན།།
གངས་ཕྲུག་བསྐལ་བཟང་དབང་ཕྱུག།

༧༽རང་ཅག་བོད་འབངས་ཡོངས་ལ།།
རང་དབང་བདེ་སྐྱིད་འཚོ་གནས།།
རང་ལུས་ཕུལ་ནས་རྩོད་མཁན།།
གངས་བུ་ཆོས་འཕེལ་ཁོང་རེད།།

༨༽དཔའ་བོའི་སྙིང་ཁམས་སྟོབས་ཀྱིས།།
ཕ་གཞིས་གངས་ལྗོངས་སྐྱོབ་པའི།།
སྲོང་བཙན་སྒམ་པོའི་ཚ་བོ།།
འགྲན་མེད་མཁའ་དབྱིངས་ཁོང་ཡིན།།

༩༽བདེན་པའི་འབོད་སྒྲ་སྒྲོག་བཞིན།།
ཚེ་སྲོག་བོད་ལ་ཕུལ་བའི།།
ཨ་མདོ་རྔ་བའི་དཔའ་རྒོད།།
ནོར་བུ་དགྲ་འདུལ་ཁོང་རེད།།

༡༠༽མ་གྱུར་སེམས་ཅན་དོན་དུ།།
སེམས་དཔའི་སྤྱོད་པར་བསླབས་ནས།།
རང་བདེ་རྩྭ་ལྟར་དོར་བའི།།
དཔའ་མོ་བསྟན་འཛིན་དབང་མོ།།

༡༡༽ཡབ་མེས་བཙན་པོའི་སྙིང་སྟོབས།།
མེ་དཔུང་ཀློང་ནས་སྟོན་པའི།།
དཀར་མཛེས་ལྗོངས་ཀྱི་སེམས་དཔའ།།
ཟླ་བ་ཚེ་རིང་ཁོང་ཡིན།།

༡༢༽རྩེ་གཅིག་བསྒོམས་པའི་བྱམས་བརྩེའི།།
སྙིང་པོ་ཉམས་སུ་བླངས་པའི།།
མདོ་ཁམས་རྟའུའི་དཔའ་མོ།།
བཙུན་མ་དཔལ་ལྡན་ཆོས་བཟང་།།

༡༣༽བོད་ལྗོངས་བོད་ལ་བདག་པའི།།
འཚེ་མེད་འབོད་སྒྲ་སྒྲོག་མཁན།།
ཆབ་མདོའི་ཡུལ་གྱི་ཉི་གཞོན།།
བསྟན་འཛིན་ཕུན་ཚོགས་ཁོང་རེད།།

༡༤༽ཕ་རོལ་མེ་མདའི་རྩེ་ནས།།
བོད་ཡུལ་མུན་པ་སེལ་ཆེད།།
རང་ཉིད་མཆོད་མེར་སྦར་བའི།།
མདོ་སྨད་དཔའ་བོ་ཚུལ་ཁྲིམས།།

༡༥༽བདེན་པའི་ཀུ་སྒྲ་སྒྲོག་གིན།།
གཅེས་སྲོག་བོད་ལ་ཕུལ་བའི།།
བསྟན་སྲིད་སྐྱོབ་པའི་དཔའ་བོ།།
རྔ་ལྗོངས་བསྟན་ཉི་ཁོང་ཡིན།།

༡༦༽གཞན་དོན་སེམས་དཔའི་རྣམ་ཐར།།
དོན་གྱིས་བདག་གིར་མཛད་ནས།།
ཞལ་ཆེམས་བོད་ལ་སྒྲོག་མཁན།།
སྤྲུལ་སྐུ་བསོད་བྷ་ཁོང་རེད།།

༡༧༽རང་རྒྱལ་རང་ལ་དབང་ཆེད།།
རང་ཡུལ་ཁ་བའི་ལྗོངས་ནས།།
རང་སྲོག་བོད་ལ་སྤྲོད་མཁན།།
བློ་བཟང་འཇམ་དབྱངས་ཁོང་ཡིན།།

༡༨༽གཞིས་བྱེས་ལྷན་འཛོམས་ངང་ནས།།
བོད་ཡུལ་བདེ་སྐྱིད་ཡོང་ཕྱིར།།
གཅེས་སྲོག་མཆོད་མེར་སྒྲོན་མཁན།།
རིག་འཛིན་རྡོ་རྗེ་ཁོང་རེད།།

༡༩༽གཉིས་ཕན་དབུ་མའི་ལམ་ནས།།
དོན་དམ་རང་དབང་འཐོབ་ཆེད།།
ཡུལ་ཤུལ་སྒྲོན་མེར་སྤྲུལ་པ།།
ཁྲི་འདུའི་བསོད་ནམས་རབ་ཡངས།།

༢༠༽སྟག་མོར་ལུས་སྦྱིན་མཛད་པའི།།
རྟོགས་བརྗོད་ཉམས་སུ་ལེན་མཁན།།
སྙིགས་དུས་ཆོས་ཀྱི་སྒྲོན་མེ།།
དཔའ་མོ་བསྟན་འཛིན་ཆོས་སྒྲོན།།

༢༡༽གངས་ཅན་བསྟན་སྲིད་དོན་དུ།།
སྙིང་སྟོབས་མེ་རུ་སྦར་པའི།།
ཤཱཀྱ་ཐུབ་པའི་ཐུགས་སྲས།།
བློ་བཟང་རྒྱ་མཚོ་ཁོང་ཡིན།།

༢༢༽རྨད་བྱུང་བྱང་སེམས་མཛད་པས།།
རང་ཉིད་ཡལ་བར་དོར་བའི།།
མཚོ་སྔོན་ཐེམ་ཆེན་ཡུལ་གྱི།།
སེམས་དཔའ་དམ་ཆོས་བཟང་པོ།།

༢༣༽འཛམ་གླིང་རྒྱལ་ཁམས་ཡོངས་ལ།།
བོད་ཀྱི་གནས་བབ་སྟོན་ཕྱིར།།
རང་གི་ཡོད་ཚད་བསྒྲོན་པའི།།
འཛམ་ཐང་དཔའ་བོ་སྣང་གྲོལ།།

༢༤༽གཞོན་གཞོན་ལང་ཚོའི་མེ་ཏོག།
མི་རིགས་ལ་རྒྱར་ཕུལ་ནས།།
ཀན་ལྷོ་རྨ་ཆུའི་སློབ་མ།།
དཔའ་མོ་ཚེ་རིང་སྐྱིད་ཡིན།།

༢༥༽ཨ་མས་བུ་ཕྲུག་བསྐྱུར་ནས།།
བོད་མིའི་སྡུག་བསྔལ་སེལ་ཆེད།།
གཅེས་སྲོག་མེ་རུ་བསྒྲོན་པའི།།
གངས་ཅན་དཔའ་མོ་རིན་ཆེན།།

༢༦༽བོད་ཡུལ་མུན་པའི་གླིང་ནས།།
རང་ལུས་མེ་ལ་སྦར་བཞིན།།
བོད་དོན་བདེན་པ་སྟོན་མཁན།།
དཔའ་རྒོད་རྡོ་རྗེ་ཁོང་རེད།།

༢༧༽རྨད་བྱུང་སྙིང་རྗེ་ཆེན་པོའི།།
སྤྱན་གྱིས་བོད་ལ་གཟིགས་ནས།།
རང་ཉིད་བློས་གཏོང་བྱས་པའི།།
སེམས་དཔའ་དགེ་པེ་ཁོང་ཡིན།།

༢༨༽གཞན་དོན་འབའ་ཞིག་བསྒྲུབ་ཕྱིར།།
རང་ཉིད་ཡོངས་སུ་བཏང་བའི།།
རྨ་ལྷོ་རེབ་གོང་ཡུལ་གྱི།།
བྱང་སེམས་འཇམ་དབྱངས་དཔལ་ལྡན།།

༢༩༽འཚེ་མེད་ཞི་བའི་ངང་ནས།།
རང་ཉིད་ཡོངས་སུ་སྦར་བཞིན།།
༧གོང་ས་མཆོག་ལ་འབོད་པའི།།
དཔའ་བོ་བློ་བཟང་ཚུལ་ཁྲིམས།།

༣༠༽རང་ཡུལ་ཁ་བའི་ལྗོངས་སུ།།
ཞི་བདེའི་དེད་དཔོན་བསུ་ཕྱིར།།
མེ་ནང་མཆོང་བའི་དཔའ་རྒོད།།
རེབ་གོང་བསོད་ནམས་དར་རྒྱས།།

༣༡༽འཇིག་རྟེན་མི་སྡེའི་རང་དབང་།།
རང་ཅག་ཡོངས་ལ་འཐོབ་ཆེད།།
རང་གིས་རང་ཉིད་སྦར་པའི།།
དཔའ་བོ་བློ་བཟང་ཤེས་རབ།།

༣༢༽བོད་དོན་ལ་རྒྱའི་མེ་ལྕེ།།
སེམས་ནས་ལུས་ལ་འབར་བའི།།
རྒྱལ་རོང་དཔའ་བོའི་སྤུན་གྲོགས།།
བསྟན་པ་དར་རྒྱས་ཁོང་ཡིན།།

༣༣༽བདེན་མཐའ་བདེན་པས་གསལ་ཆེད།།
བདེན་དཔང་གཅེས་སྲོག་སྦར་མཁན།།
འབར་ཁམས་ཚོ་བདུན་ཡུལ་གྱི།།
དཔའ་བོ་འཆི་མེད་དཔལ་ལྡན།།

གཉིས་པ། རྒྱལ་གཅེས་དཔའ་བོའི་ལེའུ།

༣༤༽གངས་ཅན་ལོ་རྒྱུས་ནང་དུ།།
ཞི་རྒོལ་གསར་བཏོད་བྱེད་པོ།།
བཙན་བྱོལ་དཔའ་བོའི་ཐོག་མ།།
ཐུབ་བསྟན་དངོས་གྲུབ་ཁོང་རེད།།

༣༥༽འཛམ་གླིང་རྒྱལ་སྤྱིའི་མིག་ཏུ།།
བོད་དོན་བདེན་པ་སྟོན་ཕྱིར།།
བདེན་པའི་མེ་ལྕེ་སྒྲོན་མཁན།།
མིག་དམར་དཔའ་བོ་ཁོང་ཡིན།།

༣༦༽རང་རེའི་རྩ་དོན་ཆེད་དུ།།
རང་འགན་རང་གིས་བསྒྲུབ་ཕྱིར།།
རང་ལུས་མེ་ལ་བསྟིམས་པའི།།
དཔའ་རྒོད་འཇམ་དཔལ་ཡེ་ཤེས།།

གསུམ་པ།། རྒྱལ་གཅེས་དཔའ་བོ་དཔའ་མོའི་ལེའུ།།

བོད་དང་བོད་པའི་ཡོད་ཚད།།
གཞན་ལ་ཤོར་བའི་ཉིན་ནས།།
གངས་ཅན་བཙན་པོའི་སྙིང་སྟོབས།།
གཞིས་བྱེས་གཉིས་ནས་མཆེད་ཡོད།།

རང་རེའི་བསྟན་སྲིད་ཆེད་དུ།།
ལུས་སྲོག་ལོངས་སྤྱོད་དོར་ཞིང་།།
མི་ཚེར་བཙོན་ལ་བསྡད་ནས།།
དཀའ་སྡུག་མྱོང་མཁན་གྲངས་མེད།།

ཁ་སང་པཎ་ཆེན་ཡང་སྲིད།།
དེ་རིང་བསད་རྨས་མང་པོ།།
སང་ཉིན་འཛིན་རྒྱུའི་བོད་མི།།
ཡོད་ཚད་རང་རེའི་རྩ་དོན།།

གཞིས་བྱེས་གཉིས་ན་ཡོད་པའི།།
རང་རེའི་བདེན་དོན་ཕྱིར་དུ།།
ལུས་སེམས་མནར་ཞིང་གདུང་བའི།།
རྒྱལ་གཅེས་སྤུན་ཟླ་ཡོངས་རྫོགས།།

མདོར་ན་རང་རེའི་བོད་ཀྱི།།
རྩ་དོན་རྩ་བ་སྒུལ་པའི།།
བོད་དང་བོད་དོན་སྒྲུབ་མཁན།།
ཀུན་ལ་རྗེས་དྲན་ཞུ་འོ།།

འོན་ཀྱང་སྐུ་ངོའི་གོ་སར།།
འགྱིངས་ནས་རྫིག་གཏམ་སྒྲོག་མཁན།།
སྤྱི་དོན་དར་ཆ་འཕྱར་བཞིན།།
རང་དོན་ཁོ་ནར་འབད་མཁན།།

རང་རྒྱལ་རང་རིགས་ཕྱོགས་ལ།།
ལ་རྒྱའི་སེམས་ཤུགས་མེད་མཁན།།
ཕྱི་འཇམ་ནང་རྩུབ་མཁན་གྱི།།
སྐབས་འཚོལ་དཀྲུག་ཤིང་མཁན་ཚོ།།

དེང་གི་ཛ་དྲག་དུས་སུ།།
ཆིག་སྒྲིལ་གཏོར་བཤིག་མཁན་དང་།།
མགོ་འདོགས་ཉུལ་མ་མཁན་ཚོར།།
ནམ་ཡང་བཤང་གཅིས་མཆོད་དོ།།

གངས་ཅན་རྒྱལ་གཅེས་པ་ཚོས།།
གཅེས་སྲོག་བཏང་བའི་དགོས་འདུན།།
བོད་ཡུལ་བོད་པར་དབང་ནས།།
བོད་དོན་བདེན་མཐའ་གསལ་ཤོག།

ཆོལ་གསུམ་ཆིག་སྒྲིལ་ཁུ་ཚུར།།
ད་དུང་མཐོ་རུ་བསྒྲེང་བཞིན།།
རྒྱལ་ས་ལྷ་སའི་གྲོང་ནས།།
བོད་དར་ལྷབ་ལྷུབ་བསྐྱོད་ཅིག།

འདིར་བྲིས་གངས་ཅན་དཔའ་བོ།།
དཔའ་མོ་སུ་དང་གང་ཞིག།
ཆད་ལྷག་ནོར་པ་གང་ཡོད།།
ཁོ་བོས་བཟོད་གསོལ་ཞུ་འོ།།

གཞན་ཡུལ་རྒྱལ་ཁམས་ཤིག་ནས།།
རང་གིས་འཇོན་པའི་ལས་འདི།།
མྱ་ངན་ཚོར་བས་གདུང་བཞིན།།
འདི་ལྟར་ཡི་གེར་བཀོད་དོ།།

རྒྱལ་གཅེས་དཔའ་བོ་དཔའ་མོའི།།རླབས་ཆེན་བྱས་རྗེས་རི་མོ།།
གསེར་གྱི་གླེགས་བམ་འབྲི་དགོས།།
རྡོ་བརྐོས་རྡོ་རིང་བསྐྲུན་དགོས།།
དུས་རབས་འདི་ཡི་གཟི་བརྗིད།།
བོད་ཀྱི་ལོ་རྒྱུས་ལེའུར།།
གསེར་གྱི་རྐང་རྗེས་འདི་དག།ནམ་ཡང་ཡལ་བ་མེད་དོ།། ཞེས་པ་འདི་ནི་ཟླ་སྔོན་མའི་ནང་བྲིས་ཤིང་དེ་རིང་འདིར་མཇུག་བསྡུས་པར་བྱས་ཀྱང་ད་དུང་རང་རེའི་རྩ་དོན་མ་གྲུབ་བར་མུ་མཐུད་སྣོན་དགོས་པར་འདོད་དོ།།༢༠༡༢ ༤ ༡