འཇམ་དཔལ་གྱི་སྙིང་རྗེ་ལ་བསྟོད་པ།

འཕགས་པ་ཀླུ་སྒྲུབ་ཀྱིས་མཛད།

རྒྱ་གར་སྐད་དུ། ཨརྱ་མཉྫུ་ཤྲཱི་བྷ་ཊྚཱར་ཀ་ཀྵ་རུ་ན་སྟོ་ཏྲ། བོད་སྐད་དུ། རྗེ་བཙུན་འཕགས་པ་འཇམ་དཔལ་གྱི་སྙིང་རྗེ་ལ་བསྟོད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།།

ཉེས་པ་མ་ལུས་པ་རྣམས་རབ་གསལ་ཞིང་།།
ཐུབ་པའི་གྲགས་པས་འགྲོ་བ་མ་ལུས་ཁྱབ།།
དཔལ་ལྡན་རབ་ཏུ་བརྟན་པའི་སྐུ་མངའ་བ།།
དཔལ་ལྡན་ཁྱེད་ལ་རྟག་ཏུ་ཕྱག་འཚལ་ལོ།།

བོས་ཤིང་བོས་ཤིང་འགྲོ་བ་མ་ལུས་པ།།
ཕོངས་པ་འདི་དག་ཀུན་ལས་ཁྱེད་སྐྱོབ་མཛད།།
བདག་ནི་སྡུག་བསྔལ་གྱུར་ཀྱང་དམན་ཁྱེད་ཅེས།།
ཅི་ཡི་ཕྱིར་ན་ངེས་པར་སེལ་མི་མཛད།།

བཅོམ་ལྡན་ཁྱེད་ནི་རྟག་པར་ཐམས་ཅད་ལ།།
རྣམ་པ་ཀུན་ཏུ་ཐམས་ཅད་གསལ་གྲགས་ན།།
བདག་ལ་མཐོང་བ་ཙམ་ཡང་མི་སྩལ་བས།།
དེ་ཕྱིར་བདག་ནི་ཤིན་ཏུ་བསྐལ་དམན་ལགས།།

ཡོན་ཏན་ལྡན་ཞིང་ཉེས་པ་སེལ་མཛད་པ།།
བློ་བཟང་འགྲོ་ཀུན་སྐྱོབ་པར་བརྩོན་གྱུར་ན།།
བདག་བློ་ཁྱེད་ལ་མངོན་དུ་ཞེན་ན་ཡང་།།
ཕོངས་པས་གདུངས་པ་ཉིད་དུ་ཅི་ཕྱིར་འགྱུར།།

ཐུགས་རྗེ་བདག་ཉིད་ལྡན་པ་ཁྱེད་ཀྱི་ནི།།
པདྨ་ལྟ་བུ་དག་པའི་སྤྱན་གཉིས་ཀྱིས།།
འགྲོ་བར་ཕན་པར་མཛད་ཀྱང་བདག་སྡུག་པར།།
མ་གཟིགས་པ་ནི་ཀྱེ་མ་སྡུག་བསྔལ་ལོ།།

ཁྱེད་ཀྱིས་ཡིད་འཇགས་དབུགས་འབྱིན་མཛད་པ་ཡི།།
ཕྱག་གི་པདྨ་རིང་དུ་རྟག་རྐྱོང་ཡང་།།
སྐལ་ཉེས་པ་ཡི་ཚ་བས་དེ་ཡང་ནི།།
ཐག་རིང་དུ་ནི་མི་སྣང་ཉིད་དུ་འགྱུར།།

ཁྱེད་ཀྱི་སྙན་ནི་མི་ཉམས་གཙང་བ་དག།
གཉིས་ཀྱིས་ཀྱང་ནི་ལུས་ལ་སྡུག་བསྔལ་གྱིས།།
གཟིར་ཏེ་སྤྱན་སྔར་འོ་དོད་འབོད་གྱུར་ཀྱང་།།
བདག་གི་དམན་པ་ཅི་ཕྱིར་གསན་མ་གྱུར།།

རྣམ་པ་ཀུན་ཏུ་ཐུགས་རྗེས་དྲངས་ཁྱེད་ཀྱིས།།
དམྱལ་བར་སོང་བའི་འགྲོ་རིགས་བདེ་མཛད་ན།།
སྡིག་ཅན་བདག་ལ་བཅོམ་ལྡན་འདས་ཀྱིས་ནི།།
ཐུགས་རྗེ་དེ་ཡང་བརྩེ་བར་མི་མངའ་འགྱུར།།

འཇིག་རྟེན་དམན་ལ་ཕན་པར་མཛད་པ་ཡི།།
ཁྱེད་ལ་གཞོན་ནུའི་རལ་པ་འདི་མངའ་ན།།
གང་འདི་བདག་ནི་སྡུག་བསྔལ་གྱིས་གཟིར་ཀྱང་།།
བསྐྱབ་པར་མི་མཛད་སྡིག་ཅན་བསམ་པས་ཉེས།།

འདི་ན་སྡུག་བསྔལ་ཅན་ནི་གང་ཡིན་ཞེས།།
གླེན་གང་གང་གི་ཕུན་ཚོགས་ཟད་གྱུར་ཅེས།།
དེ་ལྟར་རྣམ་པར་རྒྱུ་ཞིང་སྐྱོབ་མཛད་ཀྱང་།།
བདག་ཕོངས་མ་གཟིགས་ཀྱེ་མ་ངོ་མཚར་ཆེ།།

གང་ཞིག་ལ་ནི་ཚིག་སྦྱིན་གང་ཞིག་ལ།།
འཕྲལ་དུ་ཕུན་ཚོགས་རྒྱུ་ཆེན་སྦྱིན་བྱ་ཞིང་།།
དེ་ལྟར་བརྩོན་པ་ཁྱེད་ཀྱི་མཁྱེན་རབ་ཀྱིས།།
ཅི་ཡི་ཕྱིར་ན་བདག་ལ་སྐྱོབ་མི་མཛད།།

ཁྱེད་ལ་དད་པར་གྱུར་པ་སུ་མི་བདེ།།
ཁྱེད་དང་བསོད་ནམས་དམན་པ་ཞིག་མ་མཆིས།།
བདག་ནི་ཁྱེད་ལ་དད་ཀྱང་སྡུག་བསྔལ་བར།།
ཅི་ཕྱིར་གྱུར་ཅེས་ངོ་མཚར་རྣམ་པར་འཁྲུངས།།

སྡུག་བསྔལ་གཅོད་མཛད་སྨན་པ་ཆེན་པོ་ནི།།
གང་དེ་ཁྱེད་ཀྱང་བདག་ལ་སྤོང་མཛད་ན།།
བསོད་ནམས་བཅོམ་པ་བདག་གིས་གཞན་སུ་ལ།།
སྐྱབས་སུ་མཆི་བར་བགྱི་བ་ཁྱེད་ཀྱིས་གསུངས།།

འགྲོ་ལ་རྟག་ཏུ་བུ་གཅིག་འདྲ་བ་ཡི།།
བརྩེ་བའི་ཐུགས་ནི་མངའ་བཞིན་སྒྲོལ་སྤྱོད་པ།།
ཁྱེད་ཀྱང་གལ་ཏེ་བདག་གནོད་མི་སེལ་ན།།
དེ་ཚེ་བདག་ནི་མགོན་མེད་བཅོམ་པ་ལགས།།

བཅོམ་ལྡན་ཁྱེད་ནི་དྲན་པ་ཙམ་གྱིས་ནི།།
འགྲོ་ལ་འབྲས་བུ་མཉམ་མེད་ཀུན་སྩོལ་ན།།
བདག་ནི་བསྙེན་བཀུར་བགྱིད་ཀྱང་བདག་གི་ཕྱོགས།།
རྣམ་པ་ཀུན་དུ་ཕྱི་བཤོལ་ཅི་ཕྱིར་མཛད།།

དེ་ལྟར་སྨྲེ་གསོལ་བ་ཡིས་ཁྱོད་ཡོན་ཏན།།
ཆ་ཙམ་བརྗོད་ལས་བདག་གིས་དགེ་བསགས་པ།།
གང་ཡིན་དེས་ནི་འགྲོ་ལ་བསོད་ནམས་དག།།
རྒྱ་ཆར་རང་བཞིན་གྲུབ་པའི་བུམ་པ་བཟང་།།

ཡིད་བཞིན་ནོར་བུ་ལྟ་བུ་གཟུགས་སྐུ་ཡི།།
ཞབས་གཉིས་རྒྱུ་བའི་དཔག་བསམ་འདྲ་བ་ཡི།།
ཁྱེད་ཀྱི་གཞོན་ནུའི་ལུས་སུ་བདག་གྱུར་ཅིང་།།
སྐྱེ་བོ་ཀུན་ཏུ་བདག་པོ་ཉིད་གྱུར་ཅིག།།

རྗེ་བཙུན་འཕགས་པ་འཇམ་དཔལ་གྱི་སྙིང་རྗེ་ལ་བསྟོད་པ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།