ལྡི་ལི་མཐོ་རིམ་སློབ་མ་ཚོས་རྒྱ་ནག་གི་གཞུང་ཚབ་ཁང་ལ་ཕར་རྒོལ་བྱས་པ།

གནས་ཚུལ་མཁོ་སྤྲོད་པ། སྦྲ་རིགས་ཐོགས་མེད།

དེ་རིང་ཞོགས་པའི(༢༠༡༡, ༡༠, ༠༩)ཆུ་ཚོད་བཅུ་བ་ཡོལ་ཙམ་གྱི་ཐོག་ཏུ་ལྡི་ལི་རོ་ཧི་ནི་ས་གནས་མཐོ་སློབ་བོད་ཀྱི་གཞོན་ནུ་ཚོགས་པའི་གོ་སྒྲིག་དང་སྣེ་ཁྲིད་འོག་ལྡི་ལིའི་མཐོ་སློབ་ཁག་འདྲ་མིན་ནང་སློབ་གཉེར་གནང་བཞིན་པའི་མཐོ་རིམ་སློབ་ཕྲུག་བཅུ་གསུམ་(བུ་མོ་བདུན་དང་བུ་དྲུག)གྱིས་བོད་ཀྱི་རྒྱ་དར་དང་།“རང་ལུས་མེ་རུ་བསྲེག་པ། རང་དབང་གི་འབོད་སྒྲ་ཡིན།” སོགས་འབོད་ཚིག་འདྲ་མིན་ཕྱར་ནས་རྒྱལ་ཁབ་ཕྱི་ནང་གི་གསར་འགོད་པ་ལྔ་བཅུ་ལྷག་གི་མདུན་སར་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་ལ་ཕར་རྒོལ་དྲག་པོ་བྱས་པ་མ་ཟད།དབྱིན་བོད་ཧིན་གསུམ་གྱི་ཐོག་ནས་གསར་འགོད་པའི་དྲི་བར་ལན་འདེབས་དང་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལ་མགྱོགས་མྱུར་གནོན་ཤུགས་སྤྲོད་དགོས་པའི་འབོད་སྐུལ་བཅས་གནང་སོང་།

དེ་རིང་ཞོགས་པར་ཁུ་སིམ་མེར་གནས་པའི་ལྡི་ལིའི་རྒྱ་ནག་གཞུང་ཚབ་ཁང་གི་སྒོ་ཆེན་གཉིས་གློ་བུར་དུ་བོད་ཀྱི་རྒྱ་དར་དང་འཕྲེད་དར་ཁྱེར་བའི་མཐོ་སློབ་པ་སྐོར་ཞིག་གི་ངོ་རྒོལ་དང་སྐད་འབོད་འོག་ཟང་ཟིང་ལང་ལོང་དུ་གྱུར།མཐོ་སློབ་ཀྱི་གསར་བུ་ཁ་ཤས་བྱང་ཆ་ལྡན་པའི་ངང་སྔོན་ནས་གོ་སྒྲིག་བྱས་པ་བཞིན་གཞུང་ཚབ་ཀྱི་སྒོ་ཆུང་བརྒྱུད་ནས་གཞུང་ཚབ་ཁང་གི་སྒོ་ར་ནང་དུ་མཆོངས།ན་གཞོན་དེ་དག་གིས་བོད་ཀྱི་རྒྱ་དར་དང་བོད་རང་བཙན་གྱི་འབོད་ཚིག་འདྲ་མིན་སྒོ་ར་ནང་མའི་ནང་དུ་གཡུགས་བར་བརྟེན་རྒྱ་གར་ཉེན་རྟོག་སྐོར་སྲུང་བ་ལྔ་བཅུ་ལྷག་ཁོ་ཚོའི་ཕྱོགས་སུ་ཤོར།འོན་ཀྱང་། ན་གཞོན་དེ་དག་གློ་བུར་དུ་འབོད་ཚིག་སྒྲོག་བཞིན་ཕྱོགས་བཞིར་འཐོར་ནས་བྲོས་པར་བརྟེན་ཉེན་རྟོག་པ་དག་གིས་འཕྲལ་མར་སུ་རྗེས་འདེད་གཏོང་དགོས་མ་ཤེས་པར་ཅུང་ཟད་ལྷག་དགོས་བྱུང་།

སྐབས་དེར་སྒོ་ཆེན་ཕྱི་ལོགས་སུ་ཡོད་པའི་སློབ་མ་ཚོས་ཞི་བའི་ངོ་རྒོལ་ལས་འགུལ་གྱི་འགོག་སྲུང་(non-violent protection method)ཐབས་ལམ་ལག་ལེན་དུ་བསྟར་ནས་སྐད་འབོད་ཤུགས་དྲག་བྱས་པར་བརྟེན་སྐབས་ཤིག་རིང་ཉེན་རྟོག་པ་དེ་དག་ཅི་བྱ་གཏོལ་མེད་དུ་གྱུར།དེ་ནས་གློ་བུར་དུ་ཉེན་རྟོག་པ་བརྒྱ་ལྷག་གནས་དེར་འབྱོར་ཞིང་སློབ་ཕྲུག་ཕོ་མོ་དེ་དག་རེ་རེ་བཞིན་འགོག་སྲུང་ར་བ་ལས་དྲག་ཤུགས་ཀྱིས་བཀོག་ཏེ་བྱེའུ་ཁྲ་ཡིས་ཁྱེར་བའམ་རི་བོང་གླག་གིས་ཁུར་བ་བཞིན་བཙན་གྱིས་ཁྲིད་ནས་ཉེ་འདབ་ལྟ་སྲུང་བཙོན་ཁང་དུ་བསྐྱལ།སྐབས་དེར་སློབ་ཕྲུག་ཚུལ་ཁྲིམས་རྡོ་རྗེ་ལགས་བདེ་ལྕགས་འཁྱུགས་པོའི་ངང་རྒྱ་ནག་གཞུང་ཚབ་ཁང་གི་མདུན་དུ་བསླངས་པའི་ཐོག་བརྩེགས་གསུམ་ལྷག་གི་མཐོ་ཚད་ཡོད་པའི་གློག་སྡོང་རིང་བོ་དེའི་ཐོག་ཏུ་འཛེགས་ནས་ལྷབ་ལྷུབ་གཡོ་བའི་བོད་ཀྱི་རྒྱ་དར་མཁའ་དབྱིངས་སུ་ཕྱར།གསར་འགོད་པ་དག་གི་མདུན་དུ་ཁོ་གློག་སྡོང་གི་རྩེ་མོར་གྲོང་ངེར་འགྱིངས་ནས་རྒྱ་དར་རྒྱ་ནག་གཞུང་ཚབ་ཁང་གི་མདུན་གྱི་བར་སྣང་དུ་བོད་ཀྱི་རྒྱ་དར་འཕྱར་ཞོར་སྐར་མ་ཉི་ཤུ་ལྷག་ལ་སྐད་འབོད་བྱས། སྐབས་དེར། ཁྲག་ལྟར་དམར་བའི་སྐར་ལྔའི་དར་དམར་དང་ཆེས་ཐག་ཉེ་བའི་གཞུང་ཚབ་མདུན་གྱི་བར་སྣང་དུ་གངས་སེང་གི་དར་ཆ་སྤོབས་པས་ངང་གཡུགས་རྒྱུ་བྱུང་བ་ནི་ཇི་འདྲའི་གཟི་བརྗིད་ལྡན་པའི་སྣང་ཚུལ་ཞིག་རེད་ཨང་།

ད་ལྟ། མཐོ་སློབ་ཀྱི་སློབ་ཕྲུག་བཅུ་གསུམ་པོ་ཚང་མ་ཅ་ན་ག་པོས་རིའི་(Chanakyapuri)བཙོན་ཁང་དུ་ཡོད་ལ། སང་ཉིན་སློབ་ཕྲུག་ཚང་མ་ལྡི་ལི་གསར་བའི་ཁྲིམས་ཁང་དུ་བཅར་ནས་ཚུལ་ལ་རྩད་ཞིབ་དང་སྐབས་བབ་ཉེས་ཁྲིམས་གང་བབ་འཁུར་དགོས་པ་རེད།ལྡི་ལི་རོ་ཧི་ནི་ས་གནས་བོད་ཀྱི་གཞོན་ནུའི་ཚོགས་གཙོ་དཔལ་ལྡན་བསོད་ནམས་ཀྱིས་གསར་འགོད་པར་བརྗོད་དོན་“ང་ཚོས་སྔོན་པའི་མཐོ་སློབ་ཀྱི་བདུན་ཕྲག་གཅིག་གི་ཟས་བཅད་ངོ་རྒོལ་དང་དེ་རིང་གི་ངོ་རྒོལ་འདི་གཉིས་ཀྱི་དམིགས་ཡུལ་གཙོ་བོ་ཉེ་ལམ་བོད་ནང་དུ་མུ་མཐུད་བོད་བོད་དོན་ཆེད་རང་ལུས་མེ་བསྲེགས་གཏོང་བཞིན་པའི་དཔའ་བོ་དག་གི་འབོད་སྐུལ་ལ་རྒྱ་གཞུང་གིས་ཉན་འཇོག་བྱེད་དགོས་པ་དང་།དེ་བཞིན་གནས་ཚུལ་ཛ་དྲག་འདི་ལ་རྒྱལ་སྤྱིའི་ངོས་ནས་ཀྱང་དོ་སྣང་བྱེད་དགོས་ཞེས་འབོད་སྐུལ་ཞུ་ཆེད་ཡིན་ལ།དེ་མིན་གནས་ཚུལ་འདི་ལྟར་མུ་མཐུད་སྣང་མེད་དུ་ལྷག་ཚེ་ང་ཚོར་ཡང་འདི་ལས་ལྷག་པའི་གྲ་སྒྲིག་དང་འཆར་གཞི་འདྲ་མིན་ཡོད་ཅེས་བརྗོད་སོང་།”

གཤམ་གྱི་དྲ་ཐག་ནས་གནས་ཚུལ་རྒྱས་པ་གཟིགས་རོགས།

1) http://www.ndtv.com/article/india/13-tibetans-arrested-after-protests-outside-chinese-embassy-in-new-delhi-139765?pfrom=home-otherstories




2) http://timesofindia.indiatimes.com/india/13-Tibetans-held-while-trying-to-enter-Chinese-embassy-in-Delhi/articleshow/10287759.cms