སྦྲ་དཔལ་ལྡན།
མི་རྟག་སྒྱུ་མའི་ལས་ཀྱིས་བརྐོས་པའི་འཇིག་རྟེན་མི་ཡི་གྲུ་ཁ་འདིར།།
ཁྱོད་ཀྱི་བརྩེ་སེམས་མེ་ཏོག་དམར་བོ་བདག་གི་སྙིང་ཁར་ལྷུང་བ་ནས།།
ཡིད་ཆེས་དྭངས་མོས་གཏམ་གྱིས་བཏེགས་པའི་བདག་གི་སེམས་པ་དམར་བོ་འདི།།
དབང་མེད་བརྩེ་བའི་གཤོག་ཟུང་ཐོགས་ནས་ཁྱོད་ཀྱི་ཕྱོགས་སུ་ལྷོད་ཀྱིས་འཕུར།།
ཨེ་མ་མཚན་མོའི་རྨི་ལམ་རེ་རེར་ཁྱོད་ཉིད་དྲན་པའི་སེམས་པ་འདིས།།
འགོག་མེད་ཡིད་ཀྱི་འཆར་སྣང་ཀློང་ནས་ཁྱོད་ཀྱི་འཛུམ་ཞལ་རི་མོར་བྲིས།།
འགྱུར་མེད་བརྩེ་བའི་སྙིང་གཏམ་དྲོན་མོའི་རྨི་ལམ་ཁྲོད་ཀྱི་སེམས་པ་དེས།།
དགའ་བའི་སྙིང་གི་མཛའ་མོ་དྲན་བཞིན་གླུ་འདི་དྲན་པའི་རྟེན་དུ་སྤྲིངས།།
བརྩེ་དུངས་མངར་མོའི་ཁ་བརྡའི་ཁྲོད་ནས་ཁྱོད་ཉིད་དྲན་པ་ཐེངས་ཤིག་མིན།།
ཐུན་གསུམ་མཚན་མོའི་རྨི་ལམ་ཞིང་ནས་ཁྱོད་ཉིད་རྨིས་པ་ཐེངས་ཤིག་མིན།།
དྲན་གདུང་སེམས་ཀྱི་མནར་གཅོད་ཁྲོད་ནས་ཁྱོད་ལ་བོས་པ་ཐེངས་ཤིག་མིན།།
འདི་གསུམ་ཡལ་མེད་དམར་ཆུང་སེམས་འདི་ཁྱོད་ལ་དུངས་བའི་དན་རྟགས་ཡིན།།
No comments:
Post a Comment
བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།