Due to our blog readers from Tibet we shifted our Tibetan blog to kyareng.wordpress.com. Now on this blog is stand for both of Tibetan and English writers
ད་ནས་བཟུང་དྲ་ལམ་དེ་བོད་ཡིག་དང་དབྱིན་ཡིག་གཉིས་ཀ་སྤྱོད་ཆོག་པ་ཞིག་ཏུ་གྱུར་པ་ཡིན་པས། རྩ་བའི་སྐྱ་རེངས་དྲྭ་ཚིག་གཤམ་གྱི་ཁ་བྱང་དུ་སྤོས་ཟིན་པ་ཡིན། kyareng.wordpress.com

Monday, April 23, 2012

པཎ་ཆེན་བདུན་ཕྲག་སྲུང་བརྩི་བྱེད་རོགས།

ཀུན་ཏུ།

བདག་སྔོན་ཆད་སློབ་ཆུང་དུ་ཡོད་སྐབས་ནམ་རྒྱུན་བདག་གི་རིག་གནས་དགེ་རྒན་དམ་པ་དེས་གཟའ་སྤེན་པ་ནམ་ཡིན་ལ་སློབ་ཕྲུག་ཚོ་ཁོང་གི་སྡོད་ཤག་ཏུ་བོས་ནས་གློག་བརྙན་འདྲ་མིན་སྟོན་བཞིན་ཡོད། འོན་ཀྱང་། དངོས་གཞིའི་གློག་བརྙན་འགོ་འཛུགས་མ་བྱས་གོང་ཁོང་གིས་རྟག་པར་ཀུན་གཟིགས་༧ པཎ་ཆེན་རིན་པོ་ཆེའི་གསུང་བཤད་དམ་ཡང་ན་པཎ་ཆེན་རིན་པོ་ཆེ་ཁོང་བོད་ཁུལ་གྱི་ས་ཆ་འདྲ་མིན་དུ་མཚམས་གཟིགས་སུ་ཕེབས་པའི་གློག་བརྙན་ཐུང་ངུ་རེ་ངེས་པར་དུ་སྟོན་བཞིན་ཡོད། སྐབས་དེར་ཁོང་གིས་མཆོད་གཤོམས་ཐོག་གི་པཎ་ཆེན་པོ་ཆེའི་སྐུ་པར་དེ་ང་ཚོར་སྟོན་ཞོར་ཞལ་རས་ལ་སྐྱོ་ཉམས་ཤིག་འཁོར་བཞིན“ཕྱི་ལོ་ ༡༩༨༩ ཟླ་ ༡ ཚེས་ ༢༨ ཉིན་མོར་ང་ཚོའི་མགོ་ཐོག་གི་ཉིན་མ་གཅིག་བཞུད་ཟིན་པ་རེད།” ཅེས་གསུངས་བཞིན་ཡོད། དེ་ལྟར་དགེ་རྒན་དམ་པ་ཁོང་གི་མདུན་ནས་རིམ་བཞིན་ང་ཚོས་པཎ་ཆེན་རིན་པོ་ཆེའི་མཛད་རྣམ་དང་གསུང་བཤད་སོགས་གནས་ཚུལ་མང་བོ་ཞིག་གོ་ཐོས་དང་རྒྱུས་ལོན་བྱུང་། དེར་བརྟེན། བདག་སློབ་འབྲིང་ལོ་རིམ་གཉིས་བར་ཡོད་སྐབས་ང་ཚོ་སློབ་ཕྲུག་འགས་མཉམ་དུ་ “པཎ་ཆེན་བདུན་ཕྲག” ཅེས་ཟླ་རེའི་ཚེས་༢༨ ཁེལ་བའི་བདུན་ཕྲག་དེར། སློབ་མ་ཚོས་བོད་རང་གི་རིག་གནས་དང་འབྲེལ་བའི་བྱེད་སྒོ་ཁག་འདྲ་མིན་དང་དེ་བཞིན་པཎ་ཆེན་རིན་པོ་ཆེ་དང་འབྲེལ་བའི་རྩོམ་ཡིག་འགྲན་བསྡུར་སོགས་དུས་དྲན་སྲུང་བརྩི་ཆད་མེད་བྱེད་བཞིན་ཡོད། ཉིན་ཞིག་ང་ཚོའི་འཛིན་རིམ་གོང་མའི་སློབ་ཕྲུག་འགས་པཎ་ཆེན་པོ་ཆེ་མཆོག་གིས་ “བོད་ནང་དུ་ཡོང་བའི་རྒྱ་རིགས་ལས་བྱེད་དག་གིས་ངེས་པར་དུ་བོད་ཡིག་དང་བོད་སྐད་སྦྱོང་དགོས་” ཞེས་པའི་གསུང་བཤད་དེའི་ཚིག་རྩར་འཇུས་ནས་སློབ་གྲྭའི་རྒྱ་ཡིག་དགེ་རྒན་ཁ་ཤས་ལ་བོད་ཡིག་དང་བོད་སྐད་སྦྱོང་དགོས་པའི་བསམ་འཆར་ཡི་གེ་ཡང་ཕུལ་མྱོང་ཡོད། ༢༠༡༢ལོའི་ཟླ་༤ཚེས་༢༥་ཉིན་མོ་འདི་ནི་བོད་མི་རིགས་ཀྱི་ཆེད་དུ་ཡོད་ཚད་བློས་གཏོང་གནང་བའི་ཀུན་གཟིགས་༧ པཎ་ཆེན་ཨེར་ཏི་ནི་ཆོས་ཀྱི་རྒྱལ་མཚན་མཆོག་རྒྱ་དམར་གྱིས་གདུག་རྩུབ་འོག་སྐུ་བཀྲོངས་ནས་བགྲང་བྱ་ཧྲིལ་བོ་ཉེར་གསུམ་ཏག་ཏག་འགོར་བའི་རྗེས་དྲན་གྱི་ཉིན་པོ་ཡིན་པས། ང་ཚོ་རླབས་ཆེན་མི་རིགས་ཀྱི་དེད་དཔོན་དམ་པ་ཁོང་གི་རྗེས་དྲན་དུ་དམིགས་ནས་བདུན་ཕྲག་འདིའི་རིང་དུ། པཎ་ཆེན་སྐུ་གོང་མ་དང་ཁོང་གི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་གཉིས་ཀྱི་སྐོར་ལ་དྲ་ཐོག་འདྲ་མིན་བརྒྱུད་བོད་རྒྱ་དབྱིན་གསུམ་གྱི་ལམ་ནས་བགྲོ་གླེང་དང་ཁོང་གི་གསུང་བཤད་ཁག་ལ་སློབ་སྦྱོང་སོགས་ཕྱོགས་ཡོངས་ནས་བོད་མི་རིགས་འདིའི་སྙིང་སྟོབས་ཀྱི་ཚབ་མཚོན་རླབས་ཆེན་བླ་མ་དམ་པ་དེས་ཐུགས་ཀྱི་མཆོད་སྤྲིན་དུ་འགྲོ་ཐུབ་པ་ཞིག་བྱེད་རོགས་ཞུ། ང་ཚོས་དྲ་རྒྱའི་བརྒྱུད་ལམ་འདི་བེད་སྤྱད་ནས་བོད་ཕྱི་ནང་གཉིས་དང་འཛམ་གླིང་གི་ས་ཁུལ་སོ་སོར་གནས་པའི་བོད་མི་ཡོངས་ཀྱིས་བདུན་ཕྲག་འདིའི་རིང་སོ་སོའི་གདོང་དེབ་(facebook)དང་བྱེའུ་སྐད(Twitter)། རྩོམ་ཁུག(Blog)སོགས་བརྒྱུད་ལམ་འདྲ་མིན་དུ་པཎ་རིན་པོ་ཆེ་དང་འབྲེལ་བའི་གནས་ཚུལ་དང་འདྲ་པར་སོགས་གང་མང་མང་སྤེལ་རོགས་ཞུ། ལོ་འདི་ནས་བཟུང་ང་ཚོས་མུ་མཐུད་ངོ་བ་དང་། རྣམ་པ། བྱེད་ཐབས་སོགས་འདྲ་མིན་གྱི་ལམ་ནས་ “པཎ་ཆེན་བདུན་ཕྲག་” བརྩི་སྲུང་བྱས་ནས་ཁོང་གི་བླ་ན་མེད་པའི་ལམ་སྟོན་དང་སྙིང་སྟོབས་སོགས་ལ་རྗེས་དྲན་དང་སློབ་སྦྱོང་བྱེད་དགོས།།

2 comments:

  1. ཀུན་ཏུ་ལགས། མཚམས་འདྲི་ཞུ། པཎ་ཆེན་ཆུང་སྲིད་རིན་པོ་ཆེའི་འཁྲུངས་སྐར་དང་ལྷག་པ་དཀར་པོར་ཁྱེད་ཉིད་ངོ་འཕྲད་བྱུང་བར་རྟེན་འབྲེལ་བཟང། དེ་རིང་པཎ་ཆེན་སྲུང་སྐར་ཉིན་མོར་ཕྱི་རོལ་དུ་ཡོད་པའི་བོད་རིགས་ཡོངས་ནས་ཕྱི་དྲོར་མར་མེའི་ཁྲོམ་སྐོར་དང་སྨོམ་ལམ་ཟབ་རྒྱས། མ་ཟད་གསར་འགོད་ལས་རིགས་སུ་ཞུགས་ཏེ་པཎ་ཆེན་ཁོང་གི་གནས་ཆུལ་ཕྱི་གླིང་པར་ཁྱབ་སྒྲགས་དང་མྱུར་དུ་སློད་གྲོལ་ཡོང་བའི་འབོད་སྐུལ་གནན་མོ་ཞུས་ཡོད། ཁྱེད་ཀྱི་མུ་འཐུད་རྩོམ་རིགས་གང་མང་སྤེལ་རོགས། ངས་འཕགས་ཡུལ་ནས་རེ་སྒུག་ཞུ་བཞིན་ཡོད།
    བཅས་གསོ་རིག་རྒྱུད་འཛིན་པ་སྨད་མཆོག་བུས།

    ReplyDelete
  2. སྨད་མཆོག་བུས་གསུངས་པ་བཞིན་ང་ཚོ་བོད་མི་ཚང་མས་པཎ་ཆུང་སྲིད་ཚུན་ནས་རྒྱ་ནག་གི་སྡུག་རྩུབ་ངོ་སྤྲོད་བྱེད་དོ།

    ReplyDelete

བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།

རང་དོན་འབའ་ཞིག་ཁོག་ཏུ་བཅངས་པ་ལས། །རྩོམ་ཡིག་དེབ་ཕྲེང་བརྒྱ་ཕྲག་བྲིས་པ་ལས། །གཞན་ལ་ཕན་ཕྱིར་རྩོམ་ཡིག་བྲི་བའི་ལས། །ཅིས་ཀྱང་ལྷག་པ་དམ་པའི་སྤྱོད་ལས་ཤེས། །
དྲ་རྒྱར་རྩོམ་ཡིག་བསྐུར་ཡུལ། kyareng@gmail.com