ཐེ་བོ་སངས་རྒྱས།
ལོ་རྒྱུས་རང་བཞིན་ཅན་གྱི་ཨ་ཤོ་ཀའི་སེངྒེའི་ཀ་མགོ་དེ་ཡུལ་དུས་དང་བསྟུན་ནས་རྒྱ་གར་བའི་རྒྱལ་རྟགས་སུ་བདམས་པ་རེད། འདི་ནང་བ་སངས་རྒྱས་པའི་ངོས་ནས་གཟི་བརྗིད་དུ་བརྩིས་ན་ཆོག་ཀྱང་འདི་རིགས་ལ་སྣང་འཇོག་བྱེད་མཁན་དཀོན་པར་གདའ།དེ་ཡང་ཨེ་ཤ་ཡའི་སེངྒེ་བཞིས་གཅིག་གིས་གཅིག་ལ་རྒྱབ་བརྟེན་ཅིང་ཡར་ལངས་པ་དེས་སྙིང་སྟོབས་དང་། སྤོབས་པ། གདེང་ཚོད། སྟོབས་ཤུགས་བཅས་མཚོན་ཅིང་། སེངྒེའི་རྟེན་གཞི་རྡོ་ཡི་མཇའ་རིས་མཐའ་རྒྱན་གོར་མོ་ཅན་ཞིག་བརྐོས་པར་མ་ཚད། དེའི་རིམ་པ་འོག་མའི་འཕྲེད་སྟེགས་ཀྱི་མཐའ་སྐོར་ལ་རྡོ་བརྐོས་འབུར་གཟུགས་ཀྱིས་ཤར་དུ་གླང་པོ་ཆེ་དང་། ལྷོར་བ་ལང་། ནུབ་ཏུ་རྟ་མཆོག བྱང་དུ་སེངྒེ་རྣམས་ཀྱི་བར་མཚམས་འཁོར་ལོ་བཞིས་བཅད་པར་སྣང་། དེ་དག་ཀྱང་མེ་ཏོག་པདྨ་མངོན་པར་བཞད་པའི་འཕྲེད་གདན་དུ་བཀོད་འདུག
དེའི་མཚན་གཞི་ནི་ཚེ་སྲོག་གི་རྩ་བའི་འབྱུང་ཁུངས་ལས་ཀྱིས་སྐྱེད་པའི་ཆོས་ཉིད་དྲན་སྐུལ་བཏང་ཞེས་བཀྲལ། ཆོས་འཁོར་འབུར་མ་གཅིག་ཀ་མགོའི་མདུན་ངོས་ཀྱི་དབུས་སུ་གསལ་བར་ཁོད་པ་དང་། བ་ལང་དེ་གཡས་ཕྱོགས་དང་རྟ་མཆོག་གཡོན་ཕྱོགས་ཐོག་གཡས་གཡོན་གྱི་སྣེ་གཉིས་སུ་ཆོས་འཁོར་གྱི་ཟུར་རེ་ཏག་ཏག་ཁེལ། གསོན་ཉམས་དོད་པའི་བརྐོས་རིས་དག་འཕྱིད་བརྡར་ལེགས་པར་བྱས་པའི་བྱེ་རྡོ་དུམ་བུ་ཉིས་བརྩེགས་ཅན་ཞིག་ཡིན། དོན་དངོས་ཐོག་འདི་ཆོས་རྒྱལ་མྱ་ངན་མེད་ལ་ཁོང་གི་བཙུན་མོ་དང་པོ་སམ་རཱ་ཇི་ཝི་ངྷི་ཤཱ་ངྷེ་ཝིའི་མཛུབ་སྟོན་ལྟར་བསྐྲུན་པར་བཤད། ཁོ་མོ་ཡང་ནང་བ་སངས་རྒྱས་པའི་རྗེས་འཇུག་ཅིག་ཡིན་ཚོད་རེད། བདག་ཅག་གི་སྟོན་པ་ཤཱཀྱ་མུ་ནེས་ཝ་ར་ན་སིར་ཆོས་འཁོར་དང་པོ་བསྐོར་ཅིང་ནང་བའི་དགེ་འདུན་གྱི་གཞི་བཙུགས་པའི་སར་ཀ་གཞུ་དེ་དྲན་རྟེན་དུ་བསླངས།
དེའི་ངོ་བོའམ་མཚོན་རྟགས་ཀ་མགོའི་གཤམ་ན་ཌེ་ཝ་ན་ག་རའི་ཡི་གེར་ satyam-eva jayate सत्यमेव जयते; སཱ་ཏི་ཡམ་ཨི་ཝཱ་ཛ་ཡནྟུ་(བདེན་པ་ཉིད་རྒྱལ་གྱུར་ཅིག) ཞེས་རྩ་ཚིག་ཏུ་བྲིས་ཡོད། ཕྱི་ལོ་ ༡༩༥༠ ལོར་སྐུ་ཞབས་མཱ་རྡ་ཝུ་སའ་ཝ་ནེས་ Madhav Sawhney,སེངྒེ་གསུམ་མངོན་ཞིང་གཅིག་རྒྱབ་ཏུ་གབ་པ་རྒྱ་གར་གྱི་རྒྱལ་རྟགས་སུ་བདམ་གསེས་བྱས་ཤིང་། ལོ་དེའི་ཕྱི་ཟླ་དང་པོའི་ཚེས་ཉེར་དྲུག་སྟེ་རྒྱ་གར་སྤྱི་མཐུན་རྒྱལ་ཁབ་དབུ་བརྙེས་པའི་ཉིན་ཨ་ཤོ་ཀའི་སེངྒེའི་ཀ་མགོ་དེ་རྒྱལ་རྟགས་སུ་གཏན་འབེབས་བྱས། སེངྒེའི་ཀ་མགོ་ངོ་མ་དེ་དེང་སང་ཝ་ར་ན་སིའི་ཉེ་འཁོར་ས་ར་ན་ཐཱའི་འགྲེམ་སྟོན་ཁང་ཞིག་ཏུ་ཉར་ཚགས་བྱས་ཡོད་པ་ངས་ཀྱང་མཐོང་མྱོང་། རྒྱལ་རྟགས་དེ་སྤྱི་འགྲོས་ལྟར་རྒྱ་གར་གཞུང་གི་ལས་ཁུངས་ཁག་གི་ལས་ཤོག་དང་དངུལ་ལོ་སོགས་སུ་དཔར་ཡོད། གཞན་ཡང་ཨ་ཤོ་ཀའི་ཆོས་འཁོར་ངྷརྨ་ཙཀྲ་དེ་རྒྱ་གར་གྱི་རྒྱལ་དར་དུའང་བཞག་ཡོད་དོ། །
No comments:
Post a Comment
བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།