དགུན་དུས་ཀྱི་མེ་ཏོག

ལས་ཀྱིས་བྱིན་པའི་གྲང་ངར་གཡོལ་མེད་དུ།།
 རེ་བའི་རྟ་བདུན་སྤྲིན་ནག་མུན་པས་བསྒྲིབས།།
 ཐབས་ཟད་ལམ་ཕྲན་ཉིད་ལས་སྨོན་འདོན་བཞིན།།
 དབྱར་གྱི་ལྗང་འདབ་གོས་གསར་རེ་སྒུག་བྱེད།། 

བདེ་བའི་གཉིད་ཀྱང་སད་ཀྱིས་བཅོམ་པ་དང་།།
དགུང་གི་རྟ་བདུན་རྡུལ་གྱིས་མྱུར་བར་བཏུམ།།
ལས་ཀྱིས་བརྙས་པའི་དགུན་དུས་མེ་ཏོག་ང་།།
དཔྱིད་ཀའི་བསོད་ནམས་མེད་པར་ཡིད་རེ་སྐྱོ།། 

ལུས་ལ་ལྗང་ལོའི་གོས་གསར་མེད་བཞིན་དུ།།
སྙིང་གི་ཕྲག་རྒྱུན་ཆུ་ཡང་དགྲ་རུ་འགྱུར།།
ཤི་གསོན་དབྱེར་མེད་འཚོ་དགོས་མི་ཚེ་འདིར།།
ལས་དབང་ཁྱེད་ཀྱིས་སྙིང་རྗེ་མི་སྐྱེས་སམ།། 

ལས་ཀྱི་འབྲས་བུ་མི་ཟད་དཔེ་བཞིན་དུ།།
བསོད་ནམས་ཉིད་ཀྱིས་འདྲེན་པའི་ལམ་ཕྲན་འདིར།།
སྐྱོ་གདུང་ལྕིའང་ཕྱི་མར་དམིགས་པ་ཡིས།།
དྲི་ཞིམ་ཚོགས་བསགས་རྟག་ཏུ་དེ་བས་བརྩོན།།
 བུ་ཆུང་གིས་ ༢༠༡༦།༡།༢༥