ཕྱིའི་ཆར་ཐག་ཆོད་ཀྱང་ནང་གི་ཐིགས་ཐག་ཆོད་ཡོད་དམ།

ཉེ་ལམ་གྱི་རྙོག་གླེང་ཐད་བསམ་གཞིགས་བྱས་པའི་ཟིན་ཐོ་ཆ་ལེ་ཆོལ་ལེ་གཤམ་གསལ།
ཁང་གསར་རྡོ་རྗེ།

༡༽༸གོང་ས་མཆོག་གི་དམིགས་བསལ་སྐུ་ཚབ་ཀྱིས་རྒྱ་ནག་གཞུང་ལ་གནང་བའི་ཡིག་ཆ་དེ་དག་༸གོང་ས་མཆོག་གི་དགོངས་པ་བཞིན་ཡིན་མིན་དང་།དབུ་མའི་ལམ་ལ་བཀའ་ཤག་གི་དབུ་མའི་ལམ་དང་༸གོང་ས་མཆོག་གི་དབུ་མའི་ལམ་ཞེས་གཉིས་ཡོད་ཚུལ་འདིར།ཉེ་ལམ་བཀའ་བློན་ཁྲི་པ་མཆོག་གིས་ལུང་རིགས་དཔང་རྟགས་དུ་མའི་སྒོ་ནས་དགག་བཞག་ཚ་ནན་གནང་ཡོད་ལ།འདས་པའི་ལོ་ཤས་ནང་དུའང་དེ་དང་འདྲ་བ་ཐེངས་ཁ་ཤས་གནང་ཟིན་འདུག ངས་དེ་སྔོན་སྤྱི་ཚོགས་ནང་འདིའི་ཐད་རྙོག་གླེང་ཕྲན་བུ་ཡོང་གི་ཡོད་པ་དེའི་གཞི་རྩ་ནི། གཅིག་ནས་སི་ཊའི་སི་བྷག་གི་གྲོས་འཆར་ལ་རིམ་པས་འགྱུར་བ་བཏང་བ་དང་མཉམ་དུ་བཀའ་བློན་ཁྲི་པ་རང་གིས་ཀྱང་དབུ་མའི་ལམ་ལ་འགྲེལ་བཤད་རིང་ཐུང་སྣ་ཚོགས་ཤིག་གནང་བ་དེར་ཐུག་འདུག་དྲན། དཔེར་ན་བཀའ་ཁྲི་མཆོག་གིས་དབུ་མའི་ལམ་ལ་མཐའ་བརྒྱད་ཚུལ་དྲུག་གི་སྒོ་ནས་འགྲེལ་བཤད་རིང་པོ་ཞིག་དང་། ཡང་དབུ་མའི་ལམ་ཀྱི་གནས་བབ་དེ་རྒྱལ་ཁབ་གཅིག་ལ་ལམ་ལུགས་གཉིས་ལས་མཐོ་བ་མིན་རུང་དམའ་བ་མིན་ཚུལ་ལྟ་བུའི་འགྲེལ་བརྗོད་ཁ་ཤས་གནང་རྗེས། མཐའ་མ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་དང་། དེ་ཡང་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ནས་དགོས་ཚུལ་གསུངས་པ་སོགས་ལ་ཐུག་པ་རེད་དྲན། འོན་ཀྱང་ཉེ་དུས་ཀྱི་གནས་ཚུལ་ལ་བལྟ་སྐབས། རྙོག་གླེང་དེ་ཚོའི་གཞི་རྩ་ནི་གཙོ་བོ་བཀའ་ཁྲིའི་གསུང་ཕྱོགས་ཀྱི་དབང་ལས་བྱུང་བ་ཞིག་མ་ཡིན་པར། རང་རེའི་སྤྱི་ཚོགས་ནང་འགལ་ཟླའི་གནས་ཚུལ་ཡོད་པའི་སྣང་ཚུལ་གསལ་པོ་ཞིག་ཏུ་མཐོང་། དེ་ཡང་འགལ་ཟླ་དེའི་ཁོངས་སུ་རང་བཙན་དང་དབུ་མའི་ལམ་གྱི་འཐབ་རྩོད་ཡོད་པར་མ་ཟད། བཀའ་ཟུར་དང་བཀའ་ཤག་གི་འགལ་ཟླ་དང་། སྤྱི་འཐུས་དང་འཛིན་སྐྱོང་གི་འགལ་ཟླ། ༸གོང་ས་མཆོག་གི་སྐུ་ཚབ་རྙིང་པ་དང་གསར་པའི་བར་གྱི་འགལ་ཟླ། སྤྱི་འཐུས་ཚོགས་གཙོ་གསར་པ་དང་རྙིང་པའི་ཤོག་ཁག ཚོ་ཁག་བཅུ་གསུམ་གྱི་རྙོག་གླེང་ཙམ་ནས་འགོ་ཚུགས་པའི་ན་ཚ་རྙིང་པ་སོགས་འགལ་ཟླ་སྣ་ཚོགས་ཡོད་པར་མངོན་ཞིང་། དེར་བརྟེན་བཀའ་ཤག་གིས་གསལ་བཤད་ཞལ་ན་ན་གནང་ནའང་འདྲ། ༸གོང་ས་མཆོག་གིས་སྦུག་དམ་འཁོད་པའི་བཀའ་ཡིག་རིན་པོ་ཆེ་སྩལ་ནའང་འདྲ། གང་ལྟར་ག་རེ་གནང་ནའང་གསལ་པོ་ཆགས་དུས་མེད་པ་འདི་ནི་མཐར་གཏུགས་ནས་བཤད་ན་རྣ་བར་མ་སོང་བ་རེད་མ་གཏོགས་རྣ་བས་མ་གོ་བ་རྩ་བ་ནས་མ་རེད༌སྙམ།

༢༽ རྙོག་གླེང་ཆེན་པོ་ཞིག་བཟོས། བགྲོ་གླེང་ཟང་ངེ་ཟིང་ངེ་ཞིག་བྱས། ཉན་ཞིབ་རིང་པོ་ཞིག་བྱས་མཐར་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་གྲོས་ཆོད་གཅིག་བཞག་པའི་ནང་ཡང་བསྐྱར་༸གོང་ས་མཆོག་གིས་ཡེ་ཤེས་དབྱིངས་དཔྱད་ཀྱིས་ཐག་གཅོད་གང་གནང་ལ་མོས་མཐུན་ཡོད་སྐོར་དང་། ལྷ་དགོངས་འགལ་འཁྲུག་བྱུང་ཚེ་བཟོད་གསོལ་ཞུ་རྒྱུ་ཡིན་སྐོར་གསལ་ཡོད། དེ་ནི་གྲོས་ཆོད་དེའི་ངོ་གདོང་རེད། འོན་ཀྱང་ཕྱོགས་གཞན་ནས་བཤད་ན། ༸གོང་ས་མཆོག་གིས་སྦྱོར་དངོས་མཇུག་གསུམ་ཚང་བའི་ཐབས་ལམ་གཞན་ཞིག་ཡོད་ན་འཁྱེར་ཤོག་ཅེས་ཞལ་གསལ་པོས་གསུངས་དུས། དེ་འདྲའི་ཐབས་ལམ་གསལ་པོ་འཆར་འབུལ་ཐུབ་པའི་ནུས་པ་མེད་པར་བརྟེན། ཡང་བསྐྱར་ཡེ་ཤེས་དབྱིངས་དཔྱད་ཀྱི་ཐོག་ཏུ་བབས་པར་སྣང་།
འདིར་ང་ཚོས་དོགས་པ་བྱེད་འོས་པ་ཞིག་ནི། རྒྱ་ནག་གཞུང་ལ་གནང་བའི་བསམ་འཆར་ཡིག་ཆ་དེར་སྤྱི་འཐུས་ཁ་ཤས་ཀྱིས་ཤི་ཡང་མོས་མཐུན་མེད་ཅེས་བཤད་པར་མ་ཟད། སྤྱི་འཐུས་ལ་ལས་ད་དུང་གླེན་རྟགས་དོད་པོས་༸གོང་ས་མཆོག་གིས་མཐའ་མའི་ཐག་གཅོད་བོད་མི་མང་གིས་བྱེད་ཀྱི་རེད་གསུངས་པ་དོན་ལ་གནས་མིན་དོགས་འདྲི་དང་། ཐ་ན་ལ་ལས་རྒྱ་ནག་འོག་ཏུ་ཕྱིན་ན་སྐྱབས་འགྲོའི་བསླབ་བྱ་དང་འགལ་མིན་གྱི་ལྐུགས་རྟགས་ཚ་བའི་དྲི་བ་དྲིས་ཚུལ་འདི་དག་ལ་བསམས་ན། སྤྱི་འཐུས་ཉུང་ཤས་འདི་ཚོས་སྤྱི་མོས་ཡོད་ཅེས་པ་ནི། ༸གོང་ས་མཆོག་དང་བོད་གཞུང་གི་མཛད་བྱུས་ལ་སྒོ་ཀུན་ནས་རྒོལ་བར་བརྩམས་ཀྱང་ལུང་རིགས་རྒྱུ་མཚན་དང་དཔུང་གང་གིས་ཀྱང་རྒོལ་བའི་ནུས་པ་ཟད། རང་ངོས་ནས་ཐབས་ལམ་འདི་ཡིན་ཞེས་པའང་འཆར་འབུལ་མ་ཐུབ་སྟབས། རེ་ཞིག་མོས་མཐུན་ཡོད་ཁུལ་བྱས་པ་ཙམ་ལས། དོན་དུ་འདི་ཚོས་སླར་གོ་སྐབས་ཐོབ་ཚེ་ཁ་གཡར་ས་གང་འོས་ཤིག་བཙལ་ཏེ་རྙོག་གླེང་བཟོ་བ་ལ་ཐེ་ཚོམ་ཅི་ཡང་མི་འདུག་སྙམ་པས། ཕྱི་ཆར་པའི་ཆར་ཐག་ཆོད་ཀྱང། ནང་ཐིགས་པའི་ཐིགས་ཐག་ད་དུང་ཆོད་མེད་དོ།། ཚིག་གཞན་གྱིས་བཤད་ན། ཁྲིམས་དོན་ལྟར་ན་ཐག་ཆོད་ཀྱང་དངོས་དོན་ལྟར་ན་ད་དུང་ཡང་འཁྲུན་ཐག་ཆོད་མི་འདུག་གོ །

༣༽ བོད་ཀྱི་རྩ་དོན་འདི་བོད་མི་ཡོངས་དང་འབྲེལ་བ་ཞིག་ཡིན་པར་བརྟེན། སེམས་ཁྲལ་ཡོད་ན་ཆོལ་ཁ་གསུམ་ཀ་ལ་འདྲ་མཉམ་དུ་ཡོད་དགོས་ཀྱང་རང་བཙན་བཤད་དུས་ཆོལ་ཁ་གསུམ་གྱི་ནང་ནས་ཆོལ་ཁ་གཅིག་གི་མི་ཁ་ཤས་ཀྱིས་རྟག་པར་ངར་དགོས་དོན་དང་། དབུ་མའི་ལམ་བཤད་དུས་སྔ་བར་ཕྱི་གསུམ་དུ་ཆོལ་ཁ་གཅིག་གི་ནང་གི་ཤོག་ཁག་གཅིག་གིས་ཚོར་སྣང་སྐྱེན་པོ་བྱེད་དོན་ཅི་ཡིན་ནམ། འདི་ལྟར་དོགས་པ་རྣམ་རྟོག་དང་འདི་ལྟར་ངར་ངར་ཤོར་ཤོར་བྱེད་པའི་རྒྱབ་ལྗོངས་སུ་གནད་དོན་གང་ཞིག་སྦས་ཡོད་དམ། འདི་ཚོ་ནི་ངས་བཤད་ཚོད་མི་ཤེས་པའི་དྲི་བ་རེད། འདི་ཚོ་ནི་ཀུན་གྱི་སེམས་ན་ཤར་བའི་དྲི་བ་རེད། དེ་ཚོར་ལན་ག་རེ་ཡོད་དམ།


༤༽ ད་ཐེངས་ཀྱི་བྱུང་རིམ་ཧྲིལ་པོར་བལྟ་སྐབས་ང་རང་ཡིད་འགུལ་ཐེབས་པའི་གནས་ཚུལ་གསུམ་བྱུང་། དེ་ཡང་དང་པོ་ནི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེས་མཛངས་དཀྱེལ་ཆེ་བའི་བློ་གྲོས་དང་། ངང་རིང་ནན་ཏན་གྱི་ཐུགས་གཤིས། གསལ་ཞིང་བརླིང་ལ་གོ་རིམ་མ་འཆོལ་བའི་དོགས་སེལ་བཀའ་ལན་རྒྱས་བསྡུས་འཚམས་པར་གནང་བ་དེ་ཡིན་ཞིང་། མཁས་བཙུན་བཟང་གསུམ་གྱི་ཡོན་ཏན་དེ་ཚོ་མཇལ་བཞིན་བོད་མི་མང་གིས་ཐད་ཀར་འོས་འདེམས་ཞུས་པའི་བཀའ་བློན་ཁྲི་པ་གཏམ་དོན་གཉིས་མཚུངས་ཤིག་དངོས་གནས་བྱུང་འདུག་སྙམ་པ་ཤར།

གཉིས་པ་ནི། རྙོག་གླེང་འདི་ཐོག་མར་རང་དབང་གི་སྤྱི་ཚོགས་ནང་དུ་རང་དབང་གི་གླེང་སྟེགས་བརྒྱུད་དེ་ཁྱབ་ཅིང་། བར་དུ་རང་དབང་མང་གཙོའི་གྲོས་ཚོགས་ནང་བགྲོ་གླེང་དང་གྲོས་ཚོགས་ཀྱིས་ཉན་ཞིབ་སྦྱང་བཤད་ནན་ཏན་གནང་། ཐ་མར་རང་དབང་མང་གཙོའི་གྲོས་ཚོགས་ཀྱིས་སྤྱི་མོས་གྲོས་ཆོད་བཞག་པའི་བརྒྱུད་རིམ་རང་ལ་གཞིགས་ན། མང་གཙོའི་དགེ་མཚན་ལ་ཡིད་ཆེས་ལྷག་པར་དུ་སྐྱེ་བ་ཞིག་འདུག་ཀྱང་། ད་དུང་བྱིས་པའི་ལག་པར་མཚོན་ཆ་བཞག་པ་ལྟ་བུའི་ཉེན་ཁ་ཡང་མཐོང་ངོ་།།

གསུམ་པ། ཞིབ་ཏུ་བརྟག་ན། བཙན་བྱོལ་བོད་མི་བརྒྱ་ཆ་ ༩༥ ཙམ་༸གོང་ས་མཆོག་གི་མཐའ་སྐོར་དུ་རྩ་དོན་ཐོག་ལངས་ཕྱོགས་གཅིག་གྱུར་རེད་འདུག་ལ་བཀའ་ཟུར་རྣམ་པ་ཕལ་མོ་ཆེའང་གནད་འགག་ལ་ཐུག་དུས་ཆེ་འཛིན་ཆུང་བསྐྱུར་གནང་ཐུབ་མཁན་རེད། དེ་བཞིན་སྤྱི་འཐུས་ཚོའི་ནང་དུའང་ལྷག་བསམ་དང་གཞུང་ཞེན། ཤེས་ཡོན་ལྡན་པའི་མི་སྣ་གང་ཙམ་ཆོལ་ཁ་གསུམ་ཁའི་ནང་འདུག་པ་མཐོང་ནས་བློ་ཅུང་ཟད་བདེའོ།།

གཞན་ཡང་དེང་རབས་ཀྱི་འཕྲུལ་ལས་ལག་རྩལ་ཡར་རྒྱས་སོང་བར་བརྟེན་ནས། དེང་སྐབས་དྷ་སར་གྲོས་ཚོགས་འཚོགས་པ་དང་ཉན་ཞིབ་ཀྱི་ལས་རིམ་ཧྲིལ་པོ་མཐུན་རྐྱེན་ལྡན་ཚེ་འཛམ་གླིང་ཡོངས་ནས་བལྟ་ཐུབ་ཅིང་། འདི་ག་ཁེ་ཎ་ཌར་ཡང་སྐབས་རེ་སྒྲ་གཟུགས་གསལ་པོ་རང་མེད་པ་དང་། སྐབས་རེ་སྒྲ་གཟུགས་གཉིས་སྔ་རྗེས་འཛོལ་བའི་དཀའ་ངལ་ཙམ་ལས་སྤྱིར་ན་གསལ་བར་བལྟ་ཉན་ཐུབ་པ། བར་བར་དུ་དཀའ་ངལ་འཕྲད་སྐབས་ལམ་སེང་འབྲེལ་ཡོད་ལས་བྱེད་ལ་ཡིག་འབྲེལ་གྱིས་གསལ་ཞུ་བྱེད་ཐུབ་པ་བཅས་དེང་རབས་ཚན་རིག་གི་ལག་རྩལ་བཀོལ་ཤེས་ན་རང་རེ་ཁ་འཐོར་བོད་མིར་ཕན་པ་ཁ་ཡོད་ལག་ཡོད་ཏུ་ཆེ་བར་སྣང་བ་ཞོར་འཕྲོས་སོ།། །།
ཁང་གསར་རྡོ་རྗེའི་ཟིན་བྲིས་ལས་བཤུས།