གངས་ཅན་རྒྱུད་ལ་འཁྲུངས་བའི་མི་ཡི་གཟུགས།།
བྱིས་པའི་དུས་ནས་ཚེ་ཡི་ཐ་མའི་བར།།
གངས་ཅན་སྐྱིད་ལ་འཇོག་པའི་སེམས་པ་འདིས།།
འཛམ་གླིང་ཡོངས་སུ་ཉམ་ཆུང་འཛུམ་གྱིས་བསྐོར།།
སྤྱན་ཕྱག་སྟོང་གི་ཟློས་གར་མི་ཡི་གཟུགས།།
བྱིས་པའི་སེམས་པ་རྩེད་འཇོ་རོལ་དགོས་ཀྱང་།།
ས་དབང་དབང་རྩོད་འཁྲུགས་པའི་རྦ་རླབས་ཀྱིས།།
བྱིས་པའི་བློ་ལ་ཤེས་རབ་རབ་ཏུ་རྒྱས།།
སྲིན་པོ་དམར་པོའི་སྡེར་མོ་མ་མཐོང་བར།།
ར་སྟག་འཁྲུགས་པའི་དམག་གི་གཡུལ་ས་ཡི།།
རང་རྒྱལ་གཞན་ཕམ་སྦྲུལ་ཐག་གཅོད་པ་ལ།།
བཅུ་དྲུག་ལང་ཚོའི་སྙིང་སྟོབས་རབ་ཏུ་རྒྱས།།
མ་ཡི་མངལ་ནས་ས་དབང་ཆེན་པོ་ཚོས།།
ཐོབ་དང་ནོར་ལ་རྔམས་པའི་སེམས་པ་འདིས།།
རང་ཡུལ་དངུལ་དུ་བརྗེ་ལ་ཉེ་བའི་ཚེ།།
དགུ་ཟུང་ལང་ཚོའི་གྲོས་མོའི་བློ་གྲོས་རྒྱས།།
སྲིན་པོ་གཡོ་ཅན་གྲོས་ཀྱི་གོང་བུ་ལ།།
མི་འདོད་བཙན་གྱིས་བདེན་ཁ་སྦྱིན་ན་ཡང་།།
གཡོ་སྒྱུ་ནོར་གྱིས་ནང་བློན་བསླུས་བའི་ཚེ།།
སེམས་ཀྱི་གསང་བ་ཁོག་ཏུ་སྦས་ལ་འདུད།།
བཅུ་ཟུང་ལྔ་ཡི་ལང་ཚོ་དར་བའི་དུས།།
གངས་ཀྱི་ཉི་མ་ལྷོ་ལ་བཞུད་པའི་ཚེ།།
ཟླ་བ་གཅིག་བུ་ལུས་བའི་སྐྱོ་གདུང་གིས།།
སྙིང་གི་ཞལ་ཆེམས་ཟླ་བ་བསྐུར་ལ་འདུད།།
འཕགས་པའི་ཡུལ་ན་སྟོན་པའི་བསྟན་པ་ཡང་།།
ལ་ཁའི་རྩེ་ན་ནུབ་ལ་ཉེ་བའི་ཚེ།།
གངས་ཀྱི་ཉི་མས་སྲོག་དབང་སྦྱིན་པ་ཡིས།།
སྟོན་པའི་རྒྱལ་ཚབ་བྱེད་ལ་སྙིང་ནས་འདུད།།
མི་འདོད་བཙན་གྱིས་རང་ཡུལ་བསྐྱུར་ན་ཡང་།།
ས་དབང་རྣམས་ཀྱིས་མི་འདོད་སྲིད་ཀྱི་གྲོས།།
དམངས་ཀྱི་མོས་པ་གཙོ་བོ་འཛིན་པ་ཡི།།
སྙིང་སྟོབས་རབ་ཏུ་རྒྱས་ལ་གུས་བའི་འདུད།།
སྟོད་སྨད་དམངས་འགའི་སེམས་པ་ཅང་ཅེ་ལ།།
འཁོར་ནས་བློ་སྙིང་བྲང་གསུམ་གཏོད་པའི་ཚེ།།
ཆོལ་གསུམ་གཅིག་གྱུར་སྒྲིལ་བའི་གོང་བུ་ཞིག།
ཐབས་ཀྱིས་སྟོན་མཁས་དེ་ལ་སྙིང་ནས་འདུད།།
སྲིད་ཀྱི་བློ་གྲོས་པད་མའི་ཆུན་པོ་ལ།།
རྟག་མཐའ་སྤོང་བའི་འདབ་མ་སྟོང་བཞད་དེ།།
དབུ་མའི་དྲི་བསུང་ཟེའུ་འབྲུ་ལེགས་འཁྲུངས་བས།།
གངས་ཅན་རྐང་དྲུག་ཚོགས་སུ་སྦྱིན་ལ་འདུད།
ཤུགས་ལྡན་རྒྱ་འདྲེས་འཕངས་བའི་སྒྱོགས་རྡོ་ལ།།
ཚུལ་གསུམ་ཚད་མའི་རྟགས་ཀྱིས་ལྷ་འདྲེ་ཡི།།
དབྱེ་བ་རྩ་མཆོག་ཀུ་ཤུའི་རྩེ་མོ་བཞིན།།
འབྱེད་མཁས་ཤེས་རབ་མཆོག་གྱུར་ཁྱེད་ལ་འདུད།།
སྙིང་རྗེ་དྲོད་ཀྱིས་བསྐྱངས་བའི་སྨྱུག་གུའི་ཚོགས།།
ཅུང་ཟད་ལྗང་ལོ་རྒྱས་ཚེ་ང་རྒྱལ་གྱིས།།
ཉི་མའི་འོད་ལ་སྤྲིན་ནག་གཡོགས་ན་ཡང་།།
བཅོས་མིན་སྙིང་རྗེ་གཟིགས་ལ་སྙིང་ནས་འདུད།།
གངས་ཅན་ལྗོངས་ནས་གྲགས་པ་མ་རྒྱས་ཀྱང་།།
འཕགས་པའི་ཡུལ་ནས་གངས་ཀྱི་ཉི་མ་ལ།།
གྲགས་པའི་དོན་དུ་ཚིགས་གསར་མདའ་འཕངས་ཡང་།།
ཤེས་རབ་རྒྱས་བའི་བདེན་ཁ་སྦྱིན་ལ་འདུད།།
ཆད་མཐའ་སྤོང་བའི་རབ་དཀར་ཆུ་འཛིན་གྱི།།
དབུ་མའི་ཞོ་གསར་སྤུངས་བའི་གོང་བུ་ཡང་།།
མངར་སྐྱུར་གང་ཡིན་མ་ཤེས་སྙིང་ཁམས་ཚོར།།
སྐྱོ་སྣང་མེད་པར་ཡང་ཡང་སྦྱིན་ལ་འདུད།།
ཟས་གཙང་སྲས་ཀྱི་གདུལ་བྱར་མ་གྱུར་བའི།།
མངོན་གྱུར་རྟགས་ལས་ལྐོག་གྱུར་མི་འདོད་ཡང་།།
རྟེན་འབྱུང་རིག་པའི་ལམ་གྱིས་འགུགས་བྱེད་པའི།།
རིག་པའི་ཀློང་ཆེན་བརྡོལ་ལ་སྙིང་ནས་འདུད།།
དོན་གཉེར་དམངས་ཀྱི་བློ་གྲོས་ཕྱེ་བའི་ཚེ།།
དུས་རབས་བཞི་ཡི་སྲིད་ཀྱི་བང་མཛོད་འདི།།
ཁམས་དང་མོས་པ་བསྟུན་སྟེ་སྦྱིན་མཁས་བའི།།
ཆོས་སྲིད་ཟུང་གི་དབང་པོ་སྙིང་ནས་འདུད།།
སྙིང་རྗེ་པད་དཀར་འདབ་མ་སྟོང་ལྡན་ཅན།།
སྲིད་ཀྱི་འགན་དབང་དམངས་ལ་གནང་ན་ཡང་།།
གངས་ཅན་སྐྱེ་འགྲོ་སྡུག་ལས་གྲོལ་བའི་ཐབས།།
གསུང་གི་བདུད་རྩིའི་ཆར་བ་ཡང་ཡང་སྩོལ།།
རྩོམ་གྱི་བརྗོད་བྱ་དང་རི་མོ་གཉིས་ཧ་ཅང་མཚུངས་བས་ཤིན་ཏུ་ལེགས
ReplyDelete