༄། །ན་མོ་གུ་རུ།
གནས་འདི་ནས་ཐག་རིང་བྱང་ཕྱོགས་ན།།
རྗེ་ཐེག་མཆོག་དགེ་བའི་བཤེས་གཉེན་བཞུགས།།
ཡུལ་དུ་མས་ཆོད་པས་མཇལ་དཀའ་ཡང་།།
གསུང་ཟབ་མོ་ཡིད་ལ་ལྷང་ལྷང་འཁོར།། ༡
ང་མུན་ནག་གར་འགྲོ་གཏོལ་མེད་ལ།།
དམ་ཆོས་ཀྱི་སྒྲོན་མེ་འདེགས་མཛད་ཀྱང་།།
ཤེས་རབ་ཀྱི་མིག་ལྡོངས་དོན་གཉེར་ཆུང་།།
མོས་ཡུལ་ཙམ་ལུས་པ་ཡིད་རེ་སྐྱོ།། ༢
སྦྱོར་དངོས་རྗེས་ཚང་བའི་སྡིག་པ་མང་།།
ཆོས་དཀར་པོ་ཆོས་བརྒྱད་འདྲེས་པ་འགའ།།
མི་བདག་ལ་ཕྱི་མའི་ཤུལ་ལམ་ན།།
རྟེན་བཟང་པོ་འཐོབ་པ་ཡོད་རེ་སྐན།། ༣
འཁོར་བ་ཞེས་ཚིག་གི་འཁོར་བ་ལ།།
ཞེན་ལོག་དེ་ནམ་མཁའི་འཇའ་ཚོན་བཞིན།།
ཐར་འདོད་ཀྱང་ངག་ལ་གོམས་པ་ཙམ།།
དུས་གཏན་གྱི་འདུན་མའི་རྩ་བ་གང་།། ༤
རང་འདོད་ཀྱི་འཁྲི་བ་ཡེ་མ་ཆོད།།
གཞན་དོན་དུ་སངས་རྒྱས་ཐོབ་སྨོན་པ།།
ཚིག་སྤྱི་ཡི་གོ་བ་སྒྲ་སྤྱིར་ཤར།།
དེས་སེམས་བསྐྱེད་ཆོག་ན་དཀའ་བ་ཅི།། ༥
དེ་ལྟར་ན་དྲིན་ཅན་དགེ་བའི་བཤེས།།
ཐུགས་མགུ་བའི་ཉམས་རྟོགས་བདག་ལ་དབེན།།
ཡིད་རྙོག་པ་མེད་པའི་དད་པ་སྐམ།།
དེ་ཙམ་ཞིག་སེམས་ཀྱི་ཁང་བུར་བདའ།། ༦
རྗེ་བཤེས་གཉེན་དམ་པར་གསོལ་བ་འདེབས།།
ཡིད་ཆོས་དང་འདྲེས་པར་བྱིན་གྱིས་རློབས།།
ཆོས་ལམ་དུ་ལྷོངས་པར་བྱིན་གྱིས་རློབས།
ལམ་མཐའ་རུ་ཕྱིན་པར་བྱིན་གྱིས་རློབས།། ༧
ཞེས་པ་ཡང ༢༠༡༠ / ༡༡ / ༡༤ ཉིན་་སློབ་བུ་ཤྲི་མིང་པས་་རང་གི་གནས་ཚད་བཤེས་གཉེན་མཆོག་ལ་ཞུས་ནས་གསོལ་བ་འདེབས་པ་ལགས།། །།
No comments:
Post a Comment
བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།