Due to our blog readers from Tibet we shifted our Tibetan blog to kyareng.wordpress.com. Now on this blog is stand for both of Tibetan and English writers
ད་ནས་བཟུང་དྲ་ལམ་དེ་བོད་ཡིག་དང་དབྱིན་ཡིག་གཉིས་ཀ་སྤྱོད་ཆོག་པ་ཞིག་ཏུ་གྱུར་པ་ཡིན་པས། རྩ་བའི་སྐྱ་རེངས་དྲྭ་ཚིག་གཤམ་གྱི་ཁ་བྱང་དུ་སྤོས་ཟིན་པ་ཡིན། kyareng.wordpress.com

Thursday, January 6, 2011

དཀྱིལ་འཁོར་གྱི་འབྱུང་བ་དང་མཚོན་དོན།

འཇིགས་མེད་ཆོས་ཀྱི་རྡོ་རྗེ།

སྤྱིར་དཀྱིལ་འཁོར་ཞེས་པ་ནི་ལྷ་གཙོ་འཁོར་རྟེན་དང་བཅས་པའི་བཀོད་པ་སྟེ་རྒྱལ་བ་རྡོ་རྗེ་འཆང་གིས་གདུལ་བྱའི་དབང་གིས་རྒྱུད་དེ་དང་དེ་གསུང་བའི་སྐབས་སུ་ལྷ་དེ་དང་དེའི་དཀྱིལ་འཁོར་གྱི་བཀོད་པ་དངོས་སུ་སྤྲུལ་ཏེ་དབང་བསྐུར་ཅིང་རྒྱུད་བསྟན། དགོངས་གཞི་དང་དགོས་པའི་དབང་གིས་བློས་བསླངས་ཀྱི་དཀྱིལ་འཁོར། རྡུལ་ཚོན་གྱི་དཀྱིལ་འཁོར། རས་བྲིས་ཀྱི་དཀྱིལ་འཁོར། ལུས་དཀྱིལ་གྱི་དཀྱིལ་འཁོར། བསམ་གཏན་གྱི་དཀྱིལ་འཁོར་ལ་སོགས་པ་ཚོགས་གཉིས་སྒྲུབ་ཚུལ་གྱི་མན་ངག་ཞིབ་པར་རྒྱུད་སྡེ་སོ་སོ་ནས་བསྟན་ཡོད། དེ་ལྟར་བོད་དུ་བཞེངས་པའི་ཚུལ་གྱི་མགོ་འབུས་ཙམ་ཞིག་སྟོན་ན། སྲོང་བཙན་ཡབ་ཡུམ་གྱིས་ར་སའི་གཙུག་ལག་ཁང་དུ་འཇམ་དཔལ་དྲག་པོའི་དཀྱིལ་འཁོར་དང་། ཐུགས་རྗེ་ཆེན་པོའི་དཀྱིལ་འཁོར་སོགས་བྲིས་བཞེངས་མཛད་པ་དང་། ཁྲི་སྲོང་གི་དུས་བསམ་ཡས་སུ་གསང་སྔགས་ཀྱི་དཀྱིལ་འཁོར་ཆ་ཚང་བཞེངས་པ་དང་། སློབ་དཔོན་ཆེན་པོས་ཕྱག་བྲིས་མཛད་པའི་དཀྱིལ་འཁོར་ཡང་མང་བར་གྲགས། ཁྱད་པར་དུ་ཕོ་བྲང་པོ་ཏ་ལ་ནི་ཕྱི་རྒྱལ་པོའི་ཕོ་བྲང་དང་། ནང་གཙུག་ལག་ཁང་། གསང་བ་བླ་མེད་ཀྱི་དཀྱིལ་འཁོར་གྱི་རྣམ་པར་བཞེངས། ས་ཆེན་གོང་མ་ན་རིམ་དང་། ཀུན་མཁྱེན་བུ་སྟོན་རིན་ཆེན་གྲུབ་ལ་སོགས་པའི་གདན་ས་དག་ཏུ་བཀའ་རྒྱུད་སོ་སོའི་ཐུན་མོང་དང་ཐུན་མོང་མ་ཡིན་པའི་དཀྱིལ་འཁོར་ཆ་ཚང་བ་རེ་བཞེངས་པར་བརྟེན། བོད་ཁམས་ཡོངས་སུ་རྡུལ་ཚོན་དང་རས་བྲིས། ལོགས་བྲིས་སོགས་ཀྱི་དཀྱིལ་འཁོར་བགྲང་ལས་འདས་པ་བཞེངས་དང་བཞེང་བ་ལྟར་དང་། ཁྱད་པར་དུ་རྗེ་ཐམས་ཅད་མཁྱེན་པས་དགའ་ལྡན་དུ་ཕྱག་ལེན་ཕྲ་ཞིབ་ཀྱིས་བདེ་གསང་ལ་སོགས་པའི་དཀྱིལ་འཁོར་དང་བློས་བསླངས་ངོ་མཚར་བ་བཞེངས་པའི་བཀའ་སྲོལ་ད་ལྟ་འཕེལ་བཞིན་པ་དང་། གཞན་རིན་པོ་ཆེའི་དཀྱིལ་འཁོར་དང་། གསེར་དངུལ། ཟངས། མུ་ཏིག ཙན་དན། སའི་རྒྱུ་སྣ་ཚོགས་ཀྱིས་བསྒྲུབས་པའང་ཤིན་ཏུ་མང་བ་ཕལ་ཆེ་བ་དུས་དབང་གིས་འཇིག་ཀྱང་ད་ལྟའང་མངོན་དུ་གྱུར་པ་མང་པོ་ཞིག་བཞུགས། བློས་བསླངས་ཞེས་པ་བློ་ངོར་སྒོམ་དོན་གྱི་དཀྱིལ་འཁོར་དེ་གཟུགས་སུ་བསླངས་པ་དང་། རྡུལ་ཚོན་ནི་རིན་ཆེན་བྱེ་མས་འབུར་ཐོན་དུ་སྤུངས་ཏེ་བཀོད་པ། རས་བྲིས་ནི་རིན་པོ་ཆེའི་ཁུ་བས་བྲིས་པ་སྟེ། ཐམས་ཅད་དཀྱིལ་འཁོར་དངོས་ཀྱི་དོད་ཐུབ་ཡིན་ཏེ། དེ་ལ་རྟེན་གཞལ་ཡས་ཁང་ལྷའི་ཕོ་བྲང་གི་རྣམ་པ་དང་། བརྟེན་པ་ལྷ་གཙོ་འཁོར་གྱི་བཀོད་པ་སྐུ་བརྙན་དང་ས་བོན་ཕྱག་མཚན་ཚོམ་བུ་ལ་སོགས་པའི་སྒོ་ནས་བཞག་པ་ཡིན་ནོ།།
དཔལ་དུས་ཀྱི་འཁོར་ལོའི་རྟེན་གཞལ་ཡས་ཁང་གི་དག་པའམ་མཚོན་བྱ་ནི། ཚད་མེད་བཞི་རྣམས་ཀྱི་དག་པས་ནི་རྡོ་རྗེ་རྩ་ཐིག་བཞི། དྲན་པ་ཉེར་བཞག་བཞིའི་རྟོགས་རིགས་མཐར་ཐུག་པ་རྣམས་ཀྱི་དག་པས་སྐུའི་རྩིག་པའི་རྒྱ་ཚད་དང་དཔངས་ཚད་ཕྱིར་ཚད་མཉམ་དུ་བྱས་པའི་ཀུན་ནས་གྲུ་བཞི་བ། ཀུན་ཉོན་ཕྱོགས་ཀྱི་རྟེན་འབྲེལ་ཡན་ལག་བཅུ་གཉིས་འགོག་པའི་ཡེ་ཤེས་ཀྱི་རྟོགས་རིགས་མཐར་ཐུག་པ་རྣམས་ཀྱི་དག་པས་དཀྱིལ་འཁོར་གསུམ་ག་བསྡོམས་པའི་སྒོ་ནི་བཅུ་གཉིས། ས་བཅུ་གཉིས་ཀྱི་རྟོགས་རིགས་མཐར་ཐུག་པ་རྣམས་དག་པས་དཀྱིལ་འཁོར་གསུམ་གའི་རྟ་བབས་དག་ནི་མཛེས་པ་བཅུ་གཉིས། འཕགས་ལམ་ཡན་ལག་བརྒྱད་པོ་རྣམས་ཀྱི་རྟོགས་རིགས་མཐར་ཐུག་པ་རྣམས་ཀྱི་དག་པས་ཕྱོགས་བརྒྱད་དུ་ནི་དུར་ཁྲོད་བརྒྱད། སྟོང་ཉིད་བཅུ་དྲུག་རྟོགས་པའི་ཡེ་ཤེས་ཀྱི་རྟོགས་རིགས་མཐར་ཐུག་པ་རྣམས་ཀྱི་དག་པས་བདེ་ཆེན་འཁོར་ལོའི་ཀ་བ་བཅུ་དྲུག ཁམས་ལྔ་རྣམས་ཀྱི་དག་པས་ཀྱང་གཞལ་ཡས་ཁང་སྟེང་འོག་ཕྱི་ནང་ཀུན་ནས་བརྩེགས་པ་དང་། རྣམ་ཐར་བརྒྱད་ཀྱི་རྟོགས་རིགས་མཐར་ཐུག་པ་རྣམས་ཀྱི་དག་པས་སྒོ་ཁྱུད་བརྒྱད། གཟུགས་ཅན་བརྒྱད་དྲི་མས་དག་པ་རྣམས་ཀྱིས་སྒོ་འགྲམ་བརྒྱད། ཡོན་ཏན་བརྒྱད་དྲི་མས་དག་པ་རྣམས་ཀྱི་སྒོ་ལོགས་བརྒྱད་དེ། སྒོ་འགྲམ་རྣམས་དང་ནི་སྒོ་ལོགས་རྣམས་ཉིད་ཀྱི་དག་པ་རྣམས་སོ།།
ཕུང་པོ་ལྔས་མཚོན་པའི་ཁ་དོག་ལྔ་ནི་རྣམ་པར་སྦྱངས་པ་སྟེ་དག་པ་དང་། དག་པ་གསུམ་གྱི་རྟོགས་པ་མཐར་ཐུག་གི་དག་པས་ཐུགས་ཀྱི་ར་བ་གསུམ་དང་། དབང་པོ་ལྔ་རྣམས་ཀྱི་དག་པས་གསུང་གི་ར་བ་ལྔ་དང་། སྟོབས་ལྔ་རྣམས་ཀྱི་རྣམ་དག་གིས་སྐུའི་ར་བ་ལྔ་སྟེ། དེ་དག་ཐུགས་གསུང་སྐུ་ཡི་དཀྱིལ་འཁོར་ལ་དེ་ལྟར་སྦྱོར་དགོས་པའོ། །གཟུངས་རྣམས་ཀྱི་དག་པས་དཀྱིལ་འཁོར་གསུམ་ག་ལ་ཡོད་པའི་ཁ་ཁྱེར་ཞེས་བྱ་བ་སྟེགས་བུ་བཞི་ཚན་གསུམ་སྟེ། ཡེ་ཤེས་ཀྱི་ཕ་རོལ་དུ་ཕྱིན་པ་བཅུ་རྫོགས་པ་དག་པ་ཡིས་རིན་པོ་ཆེའི་སྣམ་བུ་རིན་པོ་ཆེའི་འཚར་བུ་རྣམ་པར་བཀྲ་བ་དང་། སྤྱོད་པས་བསྡུས་པ་དྲུག་དང་། རྟོགས་པས་བསྡུས་པ་དྲུག འཕྲིན་ལས་ཀྱིས་བསྡུས་པ་གསུམ། ཡེ་ཤེས་ཀྱིས་བསྡུས་པ་གསུམ་སྟེ་མ་འདྲེས་པའི་ཆོས་ནི་བཅོ་བརྒྱད་ཀྱི་དག་པས་དོ་ཤལ་དང་དོ་ཤལ་ཕྱེད་པ་དཀྱིལ་འཁོར་གསུམ་པོ་དེ་རྣམས་ལ་ཡོད་པ་ཉིད་དང་། དབང་བཅུ་པོ་རྣམས་ཀྱི་དག་པས་ཀྱང་བ་ཀུ་ལི་ཤར་བུ། དགེ་བ་བཅུ་དག་པས་ཀྲ་མ་ཤིརྵ་སྟེ་མདའ་ཡབ་ཀྱི་ཕྲེང་བ། རྣམ་ཐར་གྱི་དག་པས་དྲིལ་བུའི་སྒྲ་ནི་རྫོགས་པར་སྒྲོགས་པ། རྫུ་འཕྲུལ་གྱི་རྐང་བ་བཞི་དག་པས་མདའ་ཡབ་ཀྱི་བར་རྒྱལ་མཚན་སྣ་ཚོགས་པས་གཏམས་ཤིང་དཀྲིགས་པ། ཡང་དག་སྤོང་བ་བཞི་དག་པས་མེ་ལོང་འོད་རབ་ཏུ་འབར་བ། བྱང་ཆུབ་ཡན་ལག་བདུན་གྱི་དག་པས་རྔ་ཡབ་སྣ་ཚོགས་གཡོ་བ། གསུང་རབ་ཡན་ལག་དགུ་ཡི་དག་པས་མེ་ཏོག་གི་ཕྲེང་བ་སྣ་ཚོགས་པས་བརྒྱན་པ། བསྡུ་བའི་དངོས་པོ་བཞི་བོ་རྣམས་ཀྱི་དག་པས་ནི་གཞལ་ཡས་ཁང་གི་ཟུར་དུ་སྣ་ཚོགས་རྡོ་རྗེས་བརྒྱན་པ། བདེན་པ་བཞིའི་དག་པས་རིན་ཆེན་བཞི་རྣམས་ཀྱིས་སྒོ་དང་སྒོ་ཁྱུད་མཚམས་སུ་སྤྲས་པ། མངོན་ཤེས་ལྔ་ཡི་དག་པས་རྟག་ཏུ་ནི་འོད་ཕྲེང་གི་ཟླུམ་སྐོར་ཆེན་པོ་ལྔ་ཡིས་བསྐོར་བ། སྐུ་བཞིའི་བདག་ཉིད་རྣམ་པ་ཀུན་མཁྱེན་བྱང་ཆུབ་པ་དག་པས་ཕྱི་རོལ་ཏུ་རྡོ་རྗེ་ཕྲེང་བས་ལེགས་པར་བསྐོར་བ། ཟག་མེད་ཀྱི་བདེ་བ་གཅིག་པུའི་རང་བཞིན་དུ་གནས་པ་དག་པས་ལྕགས་རི་ཡིས་བསྐོར་བ་སྟེ། ཁོར་ཡུག་ཏུ་རྡོ་རྗེའི་ཕྲེང་བ། ཡེ་ཤེས་ལྔའི་རང་བཞིན་གྱི་རྡོ་རྗེའི་མེ་ལྕེ་འབར་བས་བསྐོར་བ། ཤེས་རབ་དང་ཐབས་གཉིས་ཀྱི་ཆ་ཡི་དག་པས་ནི་ཟླ་བ་ནུབ་བཞིན་པ་དང་། ཉི་མ་རྟག་ཏུ་འཆར་བཞིན་པ། རྡོ་རྗེ་བཞི་དག་པ་ནི་སྐུ་དཀྱིལ་གྱི་རྟ་བབས་ཀྱི་ཆོས་ཀྱི་འཁོར་ལོ་དང་། བུམ་པ་ཆེན་པོ་དང་། རྔ་བོ་ཆེ་དང་། བྱང་ཆུབ་ཀྱི་ཤིང་བཞི། ཡང་རྡོ་རྗེ་བཞི་པོ་དེ་དག་དག་པ་ནི་བདེ་ཆེན་གྱི་འཁོར་ལོའི་གྲྭ་བཞིར་གནས་པའི་ཡིད་བཞིན་ནོར་བུ་དཔག་བསམ་གྱི་ཤིང་། ཆོས་ཀྱི་གཎྜི། ཆོས་ཀྱི་དུང་རྣམས་ཏེ་དེ་ལྟར་ཤེས་པར་བྱའོ།།

No comments:

Post a Comment

བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།

རང་དོན་འབའ་ཞིག་ཁོག་ཏུ་བཅངས་པ་ལས། །རྩོམ་ཡིག་དེབ་ཕྲེང་བརྒྱ་ཕྲག་བྲིས་པ་ལས། །གཞན་ལ་ཕན་ཕྱིར་རྩོམ་ཡིག་བྲི་བའི་ལས། །ཅིས་ཀྱང་ལྷག་པ་དམ་པའི་སྤྱོད་ལས་ཤེས། །
དྲ་རྒྱར་རྩོམ་ཡིག་བསྐུར་ཡུལ། kyareng@gmail.com