ཀ་ནས་ཡང་དག་བླ་མ་སངས་རྒྱས་ལ། །
ཁ་བ་ལྟར་དཀར་ཟླ་བྲལ་ལྷག་བསམ་ངང། །
ག་ཤལ་རྒྱན་ཆ་དར་སྣ་མང་བཤམས་ནས། །
ང་རྒྱལ་རྒྱགས་བྲལ་དད་པས་ཕྱག་མང་འཚལ། །
ཅ་ལག་ཁྱད་རྫས་བསགས་ལ་མ་གཟན་པར། །
ཆ་བྱད་རྣམ་དག་སྐྲ་དང་སྨ་ར་བཞར། །
ཇ་མདངས་དར་ལས་གཟན་དང་ཤམ་ཐབས་འཆང་། །
ཉ་གང་ཟླ་རྒྱས་བསམ་པས་གཞན་ཕན་བརྩམས། །
ཏ་ཐཱ་ག་ཏ་ཤཱཀྱས་གང་བསྟན་ལམ། །
ཐ་དད་རྣམ་མང་ཉན་བསམ་སྦྱངས་པས་ན། །
ད་ལྟ་རྒས་མཐར་ལྔ་ལམ་ལ་ཆས་ཀྱང་། །
ན་ཚ་འཇམ་སྐབས་སྔར་བསླབས་ཡང་ཡང་ཤར། །
པཉྩ་གྲངས་ལྡན་སྒྲ་དང་ཚད་མ་རྣམས། །
ཕ་མཐར་བརྒལ་བ་མཁས་པར་དཀའ་ན་ཡང་། །
བ་ལང་རྩྭ་གཟན་འདྲ་བར་དམན་ལས་ལ། །
མ་ཆགས་རྟག་བསླབས་སྐལ་བ་བཟང་སྙམ་ཤར། །
ཙཱནྡྲ་བ་དང་དབྱངས་ཅན་ཀ་ལཱ་པ། །
ཚ་གྲང་ནད་བརྒྱ་བསལ་ཐབས་སྨན་དཔྱད་དང་། །
ཛ་ཡས་ལྗགས་སྩལ་བཀའ་བསྟན་ཟབ་རྒྱས་གནད། །
ཝལ་ཝལ་འཆར་སླད་ཚངས་སྲས་ལྷག་ལྷར་འབད། །
ཞྭ་ཁ་ངང་མདངས་རབ་གསལ་གྲལ་ལ་འཚངས། །
ཟ་ཉལ་སྨྲ་ལ་ཨ་འཐས་གཏན་སྤངས་ནས། །
འ་ཅག་བསྟན་དང་ཕ་མར་ཕན་མཛད་ལ། །
ཡ་རབས་བྱ་བས་ནམ་ཡང་དལ་བས་དམན། །
ར་བས་མཐའ་བརྒྱན་གྲྭ་ཁང་ཉམས་དགའ་བར། །
ལ་ལ་ཐ་ཤལ་ལས་ཀས་འདའ་བ་ཕངས། །
ཤཱ་ས་ན་ལ་ལྷག་པར་དད་ལྡན་ན། །
ས་བླར་འཕགས་སླད་བསྐལ་བར་འབད་ཀྱང་དགའ། །
ཧ་ཅང་བྱ་དཀར་གྲགས་ལྡན་སྙན་ངག་ལམ། །
ཨ་རྐྱང་གདངས་སྙན་ཚངས་དབྱངས་དཔལ་ལ་འགྲན། །
སྔོན་བྱོན་མཁས་པའི་མཛད་སྲོལ་ཇི་བཞིན་དུ། །
རིག་པའི་འདོད་འཇོའི་བློ་ལས་འདི་འཁྲུངས་སོ། །
ཞེས་བྱ་བ་ནི་ཤིན་ཏུ་བྱ་དཀའ་བའི་སྙན་ངག་ཀ་མད་སུམ་ཅུ་གོ་རིམ་མ་འཆོལ་བར་ཚིག་རྐང་རེའི་ཀླད་དུ་བཀོད་ཅིང་། གི་གུ་སོགས་དབྱངས་བཞི་སྤངས་པའི་དབྱངས་ཨ་གཅིག་པུར་ངེས་པའི་ཚིགས་བཅད་ཀྱི་སྙན་ངག་སྔོན་བྱོན་པཎྚི་ཏའི་མཛད་པ་ལ་རྗེས་སུ་སྨོན་པའི་བར་སྐབས་ཀྱི་ཚིགས་བཅད་དོ། །
No comments:
Post a Comment
བསམ་འཆར་གནང་ཚུལ། གལ་ཏེ་ཁྱེད་ལ་གྷོ་གྷོལ་ཁ་བྱང་ཡོད་ན་དེ་གས་འཐུས་ལ། ཅི་སྟེ་མེད་ནའང་གཤམ་གྱི་ལྒེ་ཁུང་ནས་Anonymousཞེས་པ་དེ་འདེམས་ནས་དགོངས་འཆར་གསུངས་ཐུབ།