ངའི་ཕག་པས་ནོར་འདུག

སྤོ་སྤོ་དཀོན་མཆོག་ཚེ་རིང་གི་ཕག་པ་ཞིག་གློ་བུར་དུ་རླངས་འཁོར་གྱིས་བརྫིས་པ་རེད། སྐབས་དེར་སྤོ་སྤོ་དཀོན་མཆོག་ཚེ་རིང་གིས་ཧང་སངས་སངས་ངང་ནས། འོ་ཛི་ངའི་ཕག་པ་རླངས་འཁོར་གྱིས་བརྫིས་སོང༌། ཞེས་སྐད་ཅོར་ཆེན་པོ་བརྒྱབ་པས། རླངས་འཁོར་གཏོང་མཁན་གྱི་ཁ་ལོ་པ་དེ་ལམ་སང་མར་བབས་ཡོང་སྟེ་སྐད་ཤུགས་ཆུང་ངུས། པ་ལགས། དངོས་གནས་བྱས་ན་ཁྱེད་རང་གི་ཕག་པས་ནོར་འདུག ཡིན་ནའང་ངས་ཁྱེད་རང་ལ་སྒོར་བཅུ་སྤྲད་ཆོག་ཅེས་ཟེར་ནས་སྒོར་བཅུ་སྤྲད་པ་རེད། སྐབས་དེར་གྲོང་མི་གཅིག་གིས་དེ་དག་མཐོང་རྗེས་སེམས་ཀྱིས་མ་བཟོད་པར། སྤོ་སྤོ་དཀོན་མཆོག་ཚེ་རིང་ལགས། ཁྱེད་ཀྱིས་དགོངས་པ་ཡག་པོ་བཞེས་གནང་དང༌། ཁྱེད་ཀྱི་ཕག་པ་རླངས་འཁོར་གྱིས་བརྫིས་ནས་བསད་པར་སྒོར་བཅུ་ལས་མ་སྤྲད་པ་དཔེ་སྲིད་ཀྱི་མ་རེད། ཅེས་བརྗོད་པར། སྤོ་སྤོ་དཀོན་མཆོག་ཚེ་རིང་གིས་དགའ་སྤྲོའི་རྣམ་པ་དང་བཅས། དེ་རིང་བདག་ལ་ཁེ་བཟང་རག་བྱུང༌། དངོས་གནས་བྱས་ན་ངའི་ཕག་པས་ནོར་འདུག ཅེས་བཤད་པས་གཡས་གཡོན་གྱི་གྲོང་མི་ཚང་མ་གད་མོ་རང་དབང་མེད་པར་ཤོར་རོ། །

་མཱ་ཅང་མཁས་པའི་རྒྱལ་པོ།

སྔོན་རྒྱལ་པོ་ཞིག་མཱ་ཅང་རྒྱག་རྒྱུར་ཤིན་ཏུ་དགའ་པོ་ཡོད་ལ་མཁས་པོ་ཡང་ཡོད། ཉིན་གཅིག་རྒྱལ་པོས་ཡུལ་འདིར་མཱ་ཅང་མཁས་ཤོས་རང་ཉིད་ཡིན་པས། ངས་ཚོང་པ་འབྱོར་ལྡན་ཁག་ཅིག་དང་མཉམ་དུ་མཱ་ཅང་བརྒྱབ་ནས་རྒྱན་ཆེན་པོ་བཙུགས་ན། ང་ལ་ཁོ་ཚོའི་དཔལ་འབྱོར་ཚང་མ་ཐོབ་ཐུབ་བསམས་ནས་རང་གི་བློན་པོ་རྣམས་ལ། རང་རེའི་རྒྱལ་ཁབ་ནང་འབྱོར་ཕྱུག་ཚོའི་དཔལ་འབྱོར་ཚང་མ་ང་ལ་ཐོབ་པ་བྱ་རྒྱུ་ཡིན། བྱས་ཙང་ཁྱོད་ཚོས་འབྱོར་ཆེན་མཱ་ཅང་རྒྱག་རྒྱུར་དགའ་ལ་མཁས་པ་སུ་ཡོད་འདིར་སྐད་བཏང་ཐུབ་ན་བྱ་དགའ་སྤྲོད་རྒྱུ་ཡིན་ཞེས་བཀའ་བཏང༌། ཉིན་ཤས་རྗེས་བློན་པོ་ཞིག་གིས་སྤྲང་པོ་གོས་ཧྲུལ་ཞིང་ཤ་རིད་པ་ཞིག་ཁྲིད་ནས། རྒྱལ་པོ་རིན་པོ་ཆེས་བཀའ་གནང་བ་བཞིན་མཱ་ཅང་མཁས་ཤོས་དེ་སྐད་བཏང་ཡོད་ཅེས་སྙན་སེང་ཞུས། དེའི་རྗེས་རྒྱལ་པོས་སྤྲང་པོ་ལྟ་བུའི་མི་དེ་གཟིགས་མ་ཐག ཁོ་སྤྲང་པོ་ཞིག་མཱ་ཅང་མཁས་པ་རེད་ཅེས་འདིར་ཁྲིད་ཡོང་བ་དཔེ་མི་སྲིད་པ་རེད། ཅེས་རབ་ཏུ་ཁྲོས། སྐབས་དེར་བློན་པོ་དེས་སྐད་ཆུང་ངུས། འདི་ནི་རང་རེའི་རྒྱལ་ཁབ་ནང་གི་དཔལ་འབྱོར་ཆེ་ཤོས་དེ་རེད། ཡིན་ནའང་མཱ་ཅང་ཤིན་ཏུ་མཁས་པའི་དབང་གིས་ད་ལྟ་འདི་འདྲ་ཆགས་པ་རེད། ཅེས་ཞུས་པར་རྒྱལ་པོ་མཱ་ཅང་མཁས་པ་དེ་ཅི་བྱ་གཏོལ་མེད་དུ་ལུས་སོ། །
 ༼སྐད་ཡིག་ནི་འབྲི་ཀློག་ཉན་གསུམ་ལས་སྲུང་སྐྱོབ་བྱ་དགོས། ་་་་་་སུག་བྲིས་པ་གྲུ་ལྷོ་སྐལ་བཟང་ཕུན་ཚོགས།༽

སྐྱེ་བ་ཕྱི་མ།

གྲུ་ལྷོ་སྐལ་བཟང་ཕུན་ཚོགས། 

ནགས་ཚལ་ཆེན་པོ་ཞིག་ཡོད་པ་དེའི་ཉེ་འགྲམ་ན་རྐང་ལམ་ཕྲ་མོ་ཞིག་ཡོད་པ་དེར་བཙུན་པ་ཞིག་ཕེབས་བཞིན་པའི་སྐབས། རྔོན་པ་ཞིག་གིས་ཝ་མོ་བསད་པའི་རོ་རང་གི་ཕྲག་པར་ཁུར་ཡོང་བ་དང་ཐུག བཙུན་པ་དེས། འོ་ཛི། ཁྱེད་ཀྱིས་སེམས་ཅན་གྱི་སྲོག་གཅོད་མི་རུང༌། གལ་ཏེ་ཚེ་འདིར་གཅན་གཟན་གྱི་སྲོག་བཅད་པ་ཡིན་ན། སྐྱེ་བ་ཕྱི་མར་རང་ཉིད་གཅན་གཟན་གྱི་སྐྱེ་བ་ལེན་རྒྱུ་ཐག་ཆོད། ཅེས་གསུངས་པར་རྔོན་པ་དེས་བསམ་བློ་ཞིབ་ཙམ་བཏང་རྗེས། སྐུ་ཞབས་ལགས། ད་ལྟ་ཁྱེད་རང་གིས་གསུངས་པ་དེ་རྣམས་བདེན་པ་རེད་དམ། ཞེས་ནན་ཏན་གྱིས་དྲིས་པར། བཙུན་པ་དེས། དེ་ནི་དངོས་གནས་བདེན་པ་ཡིན་དགོས་བྱུང༌། ཞེས་གསུངས་པར། རྔོན་པའི་སེམས་ནང་སྡུག་བསྔལ་ཆེན་པོ་བྱུང་སྟེ། མིག་ཆུ་ཡང་ཤོར། དེའི་རྗེས་རྔོན་པ་དེ་གློ་བུར་དུ་ཡར་ལངས་ནས་མདའ་གཞུ་བཀང་སྟེ་ཁ་ཚུར་བསྐོར་ནས་བཙུན་པ་དེར་བཙུགས་པ་དང༌། བཙུན་པ་དེ་ནི་ཞེད་ཐག་ཆོད་ནས། ག་རེ་བྱེད་ཀྱི་ཡོད། ག་རེ་བྱེད་ཀྱི་ཡོད། ཅེས་ལབ་པར། རྔོན་པས་རང་གི་ལུས་པོ་འདར་སིག་སིག་ངང༌། སྐུ་ཞབས་ལགས། ཁྱེད་ཀྱིས་གསུངས་པ་དེ་བདེན་པ་ཡིན་ན། ངས་ཁྱེད་རང་ལ་མདའ་བརྒྱབ་སྟེ་བཀྲོངས་ན་ང་སྐྱེ་བ་ཕྱི་མར་གཅན་གཟན་དུ་མི་སྐྱེ་བར་ཁྱེད་རང་འདྲ་བའི་སྐུ་ཞབས་ཤིག་གི་ལུས་ལེན་ཐུབ་ངེས་རེད། ཅེས་ལབ་བོ།

ཚོང་པ་དང་སྤྱང་ཀི

གྲུ་ལྷོ་སྐལ་བཟང་ཕུན་ཚོགས། 

སྔ་མོ་ཡུལ་ཞིག་ན་ཚོང་པ་གཡོ་ཅན། སེར་སྣ་ཤིན་ཏུ་ཆེ་བ། ཁེ་བཟང་ལེན་མཁས་པོ་ཞིག་ཡོད། དེར་མི་རྣམས་ཀྱིས་མི་ཁྲག་འཐུང་མཁན་དང་། མི་ཤ་བཟའ་མཁན་ཞེས་ཟུར་ཟ་བྱེད་ཀྱི་ཡོད། ཉིན་གཅིག་ཚོང་པ་དེ་མི་མེད་ལུང་སྟོང་གི་ལམ་ཕྲན་ཞིག་བརྒྱུད་ཚོང་ལ་འགྲོ་སྐབས། གློ་བུར་དུ་སྤྱང་ཀི་ཞིག་ཁོའི་སྟེང་དུ་མཆོངས་ཏེ། ཁོ་པའི་སྐེ་ལ་སོ་བརྒྱབ་ནས་བཟུང་བས། ཚོང་པ་དེ་ནི་འཇིགས་སྣང་ཚད་ལས་འདས་པ་སྐྱེས་ཏེ་སྤྱང་ཀི་དེར། ངས་ཚེ་གང་རིང་སེར་སྣ་བྱས་སྟབས་ཟས་ཞིམ་པོ་ཁམ་གང་ཡང་བཟའ་མ་མྱོང་པས། ངའི་ཤ་ནི་དེ་བས་ཞིམ་པོ་མེད་པ་ཐག་ཆོད་པས་ང་གཏོང་རོགས་གནང༌། ཞེས་རེ་བ་ག་ཚོད་བཏོན་རུང༌། སྤྱང་ཀིས་མ་ཉན་པར་ཚོང་པ་དེར། ཁྱོད་སྐྱག་རྫུན་མ་ཤོད། ངས་གོ་ཚུལ་ལ་ཁྱོད་ཀྱིས་མི་ཁྲག་འཐུང་བ་དང་མི་ཤ་ཟ་བཞིན་འདུག་ཟེར་བས། ཁྱོད་ཀྱི་ཤ་མི་ཞིམ་ན་གཞན་སུའི་ཤ་ཞིམ་ཟེར་ནས་ཚོང་པ་དེ་བསད་ནས་བཟས་སོ། །

སྐར་མ་་༡༠༠ ཐོབ་པ།

གྲུ་ལྷོ་སྐལ་བཟང་ཕུན་ཚོགས།

ཨ་མ་བསམ་སྐྱིད་ཀྱིས་དུས་དང་རྣམ་པ་ཀུན་ཏུ་བུ་བསོད་ནམས་ལ་བྱམས་སྐྱོང་ཆེན་པོ་གནང་གི་ཡོད་པ་མ་ཟད། བུ་རང་སློབ་སྦྱོང་ཡག་པོ་བྱས་ན་དེས་འགྲིག་གི་འདུག ཅེས་ནང་ལས་སོགས་གཅིག་ཀྱང་སྐུལ་གྱི་མེད། གང་ཙམ་ནས་བུ་བསོད་ནམས་ཀྱིས་ལོ་འཁོར་ཡིག་རྒྱུགས་རན་པར་ཨ་མས་རང་གི་བུར་རེ་བ་ཆེན་པོ་བྱེད་ཀྱི་ཡོད་ལ། བུ་རང་ཨང་ཀི་ཐོབ་པ་བྱེད་དགོས་ཞེས་ཡང་ཡང་བརྗོད་ཀྱི་ཡོད། དེའི་རྗེས་བུས་ཡིག་རྒྱུགས་བཏང་ཟིན་པས་ཨ་མས། བུ་ཡིག་རྒྱུགས་གང་འདྲ་བྱུང་སོང་ངམ། བརྒྱ་ཆ་་ག་ཚོད་ཐོབ་བྱུང་ངམ། ཞེས་དྲིས་པར་བུས་ལམ་སང༌། ཨ་མ་ལགས། ངའི་སྦྱངས་འབྲས་ལ་བརྒྱ་ཆ་ ༡༠༠ ཐོབ་བྱུང་ཞེས་ཞུས་པ་ཨ་མས་ཐོས་མ་ཐག ཨ་མ་ནི་དགའ་ཐག་ཆོད་དེ་རང་གི་བུ་ལ་བསྟོད་བསྔགས་རྫོགས་མེད་བྱས། གང་ཙམ་ནས་ཨ་མས་བྱས་ན་བུ་རང་གི་སློབ་ཚན་ཚང་མར་བརྒྱ་ཆ་ ༡༠༠ རེ་ཐོབ་པ་རེད་དམ། ཞེས་དྲིས་པར་བུ་དེས། དེ་འདྲ་ག་པ་ག་པ། ཨང་རྩིས་ལ་སྐར་བརྒྱ་ཆ་ ༡༡ དང་། ཚན་རིག་ལ་བརྒྱ་ཆ་ ༢༡ སྐད་ཡིག་ལ་བརྒྱ་ཆ་ ༢༣ དབྱིན་ཡིག་ལ་བརྒྱ་ཆ་ ༢༥ སྤྱི་ཚོགས་རིག་གནས་ལ་བརྒྱ་ཆ་ ༢༠ བཅས་ཁྱོན་བསྡོམས་སྐར་བརྒྱ་ཆ་ ༡༠༠ རེད། ཅེས་ཞུས་པར་ཨ་མ་ཧང་སངས་ཏེ་སྡོད་པ་ལས་བྱ་ཐབས་མ་བྱུང་བ་རེད།

གདོན་འདྲེའི་ཚིག་མཛོད།༼ཚན་བཤུས༽

མཁའ་དབུགས།
འདི་ཉིད་གཏོང་ཕོད་ཅན་གྱི་དཀོན་མཆོག་གིས་དབུལ་བོ་དག་ལ་ཕུལ་བའི་འཚོ་བཅུད་ཆེས་བཟང་བོ་སྟེ། འདི་ལ་བརྟེན་ནས་ཁོ་ཚོ་ཡང་ཤ་རྒྱགས་པའི་མི་ཞིག་ཏུ་གྲུབ་ཐུབ་ཀྱིན་ཡོད། མཁའ་དབུགས།
འདི་ཉིད་གཏོང་ཕོད་ཅན་གྱི་དཀོན་མཆོག་གིས་དབུལ་བོ་དག་ལ་ཕུལ་བའི་འཚོ་བཅུད་ཆེས་བཟང་བོ་སྟེ། འདི་ལ་བརྟེན་ནས་ཁོ་ཚོ་ཡང་ཤ་རྒྱགས་པའི་མི་ཞིག་ཏུ་གྲུབ་ཐུབ་ཀྱིན་ཡོད།
རྩོམ་པ་པོ།
འདི་ཉིད་རྣམ་ཀུན་རང་གཤིས་འཇམ་པའི་སྨྱོ་ནད་ཅན་ཏེ། ཁོ་ཚོ་ཡི་གེ་བསྒྲིག་གཏོར་བྱེད་རྒྱུར་ཤིན་ཏུ་དགའ་ལ། ལ་ཤས་ཤིག་དེ་ལས་ཀྱང་ཚབས་ཆེ་བ་ཡིན་པས་སུའུ་ཏེན་གོང་མ་ཚང་གི་སློབ་གླིང་དུ་བཙད་འཁྲིད་ཀྱིས་ནོ་པེལ་ཟེར་བའི་རྩོམ་རིག་བྱ་དགའ་ཞིག་ཀྱང་སྟེར་གྱིན་འདུག
སྐྱ་རེངས།
བདེན་པ་མཇུག་རྫོགས་པར་རྩོམ་པའི་དུས་དེ་འདྲ་ཞིག་ལ་ཟེར།
སྨྱོན་པ།
རྒྱུན་དུ་གཞན་དག་སྨྱོས་འདུག་ཟེར་མཁན་གྱི་མི།
རྔོན་པ།
གཅན་གཟན་དག་སྒེར་གྱི་རྒྱུ་ཟོག་ལ་ངོས་འཛིན་མཁན་གྱི་མི།
བསམ་བློ།
སྙན་ངག་པ་དང་མགོ་སྐོར་མཁན་གཉིས་ཀྱིས་དུས་མཉམ་དུ་བཀོལ་ཀྱིན་པའི་མཛོད་ཁང་ཆེན་མོ།
མགོ་སྐོར་གཡོ་ལས།
ཚོང་བ་དག་གིས་རྒྱལ་ཁ་ལེན་སྤྱད་ཀྱི་མན་ངག་ཅིག་ལ་གོ།
ཁྱིམ་བདག
སྐྱེས་འཕེལ་གྱི་ནུས་པ་ཉམས་པའི་སྐྱེས་བུ་དག་འདུག་ཐབས་མེད་པའི་དཔོན་གནས་ཤིག་གི་མིང༌།
རྒྱན་ཆ།
བུད་མེད་དག་གིས་བརྩེ་དུང་གི་ཆེད་དུ་འདོགས་པའི་དབྱིབས་མི་འདྲ་བའི་ལྕགས་སྒྲོག་ལ།
ཁེངས་སྐྱུངས།
རི་བོང་སྤྱང་ཀིར་ཐུགས་པའི་དུས་ཀྱི་ཉམས་འགྱུར་ལ།
མཛངས་མ།
སྐྱེས་པ་ཚོས་ཁོ་མོ་དག་གི་འགུགས་ཤུགས་ལ་མཐོང་ཆུང་བྱས་པར་ཆེད་དུ་ཚན་རིག་དང༌། སྒྱུ་རྩལ། རྩོམ་རིག་སོགས་ལ་ཟུར་ཟ་བྱེད་པའི་བུད་མེད་ལ།
ཐ་མ་ཁ།
དབུལ་ཕྱུག་དང་གྲལ་རིམ་མི་ཕྱེ་བའི་འོ་སྟེ། མཆུའི་དགའ་མ། སུན་སྣང་གི་གྲོགས་པོ།
འཁོན་ལན་སློག་པ།
སྔོན་ཆད་ཀྱི་དགའ་མས་རང་ཉིད་ལ་བྲིས་པའི་བརྩེ་འཕྲིན་དག་རང་གི་དགྲ་ཟླ་སྟེ་ཁོ་མོའི་ད་ལྟའི་ཁྱོ་ཀར་བསྐུར་བ་དེ་ལྟ་བུ་ཞིག་ལ།
ཧ་ལས་པ།
ངོ་མ་ངོ་ཐོག་གིས་ང་ཚོ་ཧ་ལས་སུ་བཅུག་པའི་བྱ་བ་གཅིག་པོ་ནི། ང་ཚོ་འཇིག་རྟེན་འདི་ལ་སྐུ་གཏམས་པའི་དུས་ཏེ། དེ་ལྟར་མིན་ན། ང་ཚོས་ཅིའི་ཕྱིར་ལོ་ཧྲིལ་བོ་གཅིག་དང་ཕྱེད་ཀའི་གཡས་གཡོན་ལ་སྐད་ཆ་ཚིག་གཅིག་ཀྱང་ཤོད་མི་ཐུབ་པར་ཅི་བྱུང་སོང༌། །
༼རེ་རྐང་གླིང་གིས་བསྒྱུར༽

གསོལ་སྟོན་སྐབས་སུ་ལྕམ་ཆུང་རྟུག་དྲི་ཤོར།

དམངས་ཁྲོད་ཀྱི་ངག་རྒྱུན་ལས་གནའ་སྔ་མོ་རིན་ཆེན་རྫོང་ཞེས་པ་ཞིག་རྫོང་དཔོན་རྙིང་པ་རྩེ་དྲུང་ཞིག་གིས་རྫོང་དཔོན་གསར་པ་དྲུང་འཁོར་ཞིག་ལ་རྩིས་སྤྲོད་བྱས་པ་རེད། རྩིས་སྤྲོད་ཟིན་རྗེས་རྫོང་དཔོན་གསར་རྙིང་དང་སྤྲོད་དཔང་གཞིས་སྡོད་ཁ་ཤས་དང་། ལས་བྱ་སོགས་མཉམ་དུ་གསོལ་སྟོན་ལ་རོལ། གསོལ་སྟོན་ཉིན་དང་པོའི་དགུང་ཚིགས་ཤ་འབྲས་ཤིག་བཤམས་པ་རེད། རྫོང་དཔོན་རྙིང་པའི་སྨ་རའི་གསེབ་ཏུ་སྒ་སེས་ཚོས་པའི་འབྲས་སེར་རྡོག་གཅིག་འཁོན། དེ་ཁོ་པའི་གཟིམ་དཔོན་གྱིས་མཐོང་ནས་འདི་ལྟར་བརྗོད། འཁྲི་ཤིང་ནགས་ཀྱི་གསེབ་ཏུ་གསེར་གྱི་བྱིའུ་བབས་འདུག་ཅེས་ཟེར། རྫོང་དཔོན་རྙིང་པས་དེ་དོན་རྟོགས་ཏེ་སྨ་ར་བྱིལ་ཙམ་བྱས། ཁོང་དཔོན་གཡོག་གཉིས་ཀྱི་ཚུལ་དེར་ཚང་མ་ཡིད་སྨོན་བྱུང་། གསོལ་སྟོན་ཉིན་གཉིས་པའི་དགུང་ཚིགས་སྐབས་སུ་རྫོང་དཔོན་གསར་པའི་ལྕམ་ཆུང་རྟུག་དྲི་ཤོར་བ་རེད། ལྕམ་ཆུང་དེས་རང་ཉིད་ཀྱི་ཞལ་ཏ་མར་མིག་ཆེན་པོ་ཞིག་བལྟས་ཀྱང་མོས་ནི་རྟུག་དྲི་གཏོང་མཁན་རང་ཉིད་མིན་སྟབས་ངོ་གནོང་ཙམ་མ་བྱས། དགོང་དྲོ་ལས་ཤག་ཏུ་ལོག་རྗེས་ལྕམ་ཆུང་གིས་ད་གིན་ང་རྟུག་དྲི་ཤོར་དུས་ཁྱོད་ཡིན་ཁུལ་མ་བྱས་པ་ཅི་ཞེས་གཤེ་གཤེ་བཏང་། གསོལ་སྟོན་ཉིན་གསུམ་པའི་དགུང་ཚིགས་སྐབས་སུ་ཞལ་མ་དེས་ཁ་ས་ལྕམ་ལགས་ཀྱིས་བཏང་བའི་རྟུག་དྲི་དེ་ལྕམ་ལགས་མ་རེད་ང་ཡིན་ཞེས་གསལ་བཤད་ཅིག་བྱས་པས་དེར་ཡོད་མི་རྣམས་བཞད་གད་ཀྱི་འུར་སྒྲས་ཁེངས་སོ། །

བག་ཚ་མར་ཁུའི་གནམ་ཐང་།

སྨྱུག་རྒོད་གངས་བུ་དཔལ།

ཉིན་ཞིག་བོད་པ་གནམ་གྲུ་ནང་འགྲུལ་བསྐྱོད་ཆེད་གནམ་ཐང་དུ་ཕྱིན་པ་རེད། འོན་ཀྱང་ལམ་བར་གྱི་འགྲུལ་བསྐྱོད་རླངས་འཁོར་ནང་ཁ་ཆེ་མི་ཞིག་དང་བསྡད་རོགས་འཁེལ་བ་རེད། འགྲུལ་འཁོར་འཐོན་པ་དང་བོད་པ་དེས་ལྟོ་ཕད་ནང་ནས་ལྕགས་ཊིན་ཞིག་བཏོན་ནས་ཁ་ཕྱེ་བས་འགྲུལ་འཁོར་ཆ་ཚང་བག་ཚ་མར་ཁུའི་དྲི་མས་བཀང། བསྡད་རོགས་ཁ་ཆེ་དེས་བག་ཚ་མར་ཁུ་ད་བར་ཟ་མྱོང་མེད་པར་སོང་མིག་གིས་བལྟ་ཙམ་བལྟ་ཙམ་བྱས་པས་བོད་པ་དེས་ལམ་སེང་ཁོ་ཟ་སྙིང་འདོད་པ་ཤེས་ནས། ཁའུ། ཁའུ་ཞེས་རྒྱ་གར་སྐད་དུ་ཟོ་ལབ་པས་ཁ་ཆེ་དེའི་ཏོག་ཙམ་ཟས་པས་ཞིམ་ཐག་ཆོད་ནས་ཆ་ཚང་ཟས་པ་རེད། དེ་ནས་ཁོང་ཚོ་གནམ་ཐང་དུ་འབྱོར་བ་དང་སྒོ་སྲུང་བས་ལག་འཁྱེར་སོགས་བརྟག་དཔྱད་བྱེད་པའི་སྐབས་ཁ་ཆེ་དེ་ཀླུ་བུར་དུ་རྒྱུགས་ཕྱིན་ནས་གནམ་ཐང་ནང་དུ་ཤོར། ཁོ་གནམ་ཐང་ནང་སླེབས་པ་དང་དུག་ལོག་བཤུད་ནས་ལུས་པོ་ཡོངས་རྫོགས་འབར་རྫས་ཀྱིས་དཀྲིས་པ་བཏོན་རྗེས། མིག་གཉིས་གནམ་ལ་བལྟས་ནས་ཨ་ལ་ཨག་པར་ཞེས་དཀོན་མཆོག་རྒྱལ་་ཟེར་གྲབས་བྱེད་སྐབས་ད་གིན་བག་ཚ་མར་ཁུ་ཟ་རྒྱུ་མང་དྲག་ནས་སྐད་རྒྱག་དགག་ཟིན་པས། ཁོ་སྐད་རྒྱག་མ་ཐུབ་པར་མིད་པ་བསངས་ཐབས་བྱས་ནས་འབར་རྫས་མ་བཀས་པར་ཏོག་ཙམ་ལུས་པས་ལམ་སང་ཉེན་རྟོག་པ་ཚོས་འཇུས་པ་རེད། དེ་ནས་བཟུང་དྲན་རྟེན་ཆེད་དུ་གནམ་ཐང་དེའི་མིང་བག་ཚ་མར་ཁུར་བསྒྱུར་བ་རེད།

ལས་ཀ་འཚོལ་བ།

ཉིན་ཞིག་བུ་ཉིན་བསྐྱལ་གཅན་གཟན་ཁང་ཞིག་ཏུ་ལས་ཀ་འཚོལ་བར་ཕྱིན་པ་རེད། སྐབས་དེར་ལས་མི་བསྡུ་མཁན་དེས་བུ་ཉིན་བསྐྱལ་ལ་བྱ་རིགས་ཤིག་གི་འདྲ་པར་བསྟན་ནས། ཁྱེད་ཀྱིས་བྱ་དེའི་མིང་ག་རེ་ཡིན་མིན་ཤེས་སམ་ཞེས་དྲི་བ་བཏང་། བུ་ཉིན་བསྐྱལ་གྱིས་པར་དེར་ཡག་པོར་བལྟས་རྗེས་་ཧ་གོ་མ་སོང་ལབ། ལས་མི་བསྡུ་མཁན་དེས་་་ཁྱེད་རང་རྒྱུགས་ཚད་ལོན་མ་སོང་བས་ལས་ཀ་གལ་གནད་ཅན་རག་ཡག་ཡོད་མ་རེད། འོན་ཀྱང་ལས་ཀ་གཞན་ཞིག་སྤྲད་ཆོག ཤོད་དང་། ཁྱོད་ཀྱི་མིང་ག་རེ་རེད། ཅེས་དྲིས་པར་བུ་ཉིན་བསྐྱལ་གྱིས་ཨམ་སྦ་ནང་ནས་ཁོ་རང་གི་པར་ཞིག་སྟོན་ནས་་་་དཱ་ཁྱེད་ཀྱིས་པར་ལ་བལྟས་ནས་ངའི་མིང་ག་རེ་ཡིན་ཤེས་པ་བྱོས་དང་་ལབ་པས། ལས་མི་བསྡུ་མཁན་དེ་རེ་ཞིག་ཁ་སྐྱེངས་པོ་བྱུང་བ་རེད།

༼ སེང་གེ་དང་རི་བོང་གཉིས་པ། ༽

སྨྱུག་རྒོད་གངས་བུ་དཔལ།

ཉིན་ཞིག་ཨ་ཁུ་རི་བོང་གིས་རི་དྭགས་ཀྱི་རྒྱལ་པོ་སེང་གེ་ལ་ཁ་པར་བཏང་ནས་ཁྲོན་པའི་རྩར་ཕེབས་རོགས་ཞུས་པ་རེད། སེང་གེས་རྫིག་ཉམས་ལྡན་པའི་ངང་ཁྲོན་པའི་རྩར་སླེབས་སྐབས། རི་བོང་གིས་ཞུ་དོན་ལ། རྒྱལ་པོ་རིན་བོ་ཆེ། རྒྱལ་པོ་རིན་བོ་ཆེ། ངའི་ཁ་པར་ཁྲོན་པའི་ནང་ཟགས་སོང་བས་ཡར་འདོན་རོགས་གནང་ཞེས་ཞུས་པར། སེང་གེས། ཧ་ཧ་ཧ། ད་ཆ་ཁྱོད་གྱིས་ང་ལ་མགོ་བསྐོར་གཏོང་མི་ཐུབ།

ད་གིན་རང་་་ཁྱོད་ཀྱིས་ང་ལ་ཁ་པར་བཏང་སོང་ང་། ཞེས་ལབ་པར། རི་བོང་གིས། ཨ་ཙི། ཉིད་ལ་དབུ་བསྐོར་ག་ནས་ཞུ་ཕོད། ད་གིན་གྱི་ཁ་པར་དེ་ཨ་ཅེ་ཝ་མོའི་རེད་ཅེས་ཞུས་པ་དང། སེང་གེས། ཨ་ལད། བྱས་ན་ག་པར་ཟགས་སོང་ཅེས་ཁྲོན་པའི་ནང་ལ་གུར་གུར་བྱས་ནས་བལྟ་སྐབས། རི་བོང་གིས་ལམ་སེང་རྒྱབ་ལོགས་ནས་རྡོག་རྒྱག་གཅིག་བཞུས་ནས་སླར་ཡང་སེང་གེ་ཁྲོན་པའི་ནང་གཡུགས་སོ།།

སྦུར་པས་མགོར་བརྡུང་པ། དངོས་བྱུང་མཚར་གཏམ།

བོད་ཀྱི་ལུང་པ་ཞིག་ལ་མི་ཚང་ཆེན་པོ་ཞིག་ཡོད་པ་དེར་བུ་ཞིག་ཡོད། ཐེངས་ཤིག་ལུང་པ་དེ་གཞན་དང་དཁྲུག་པ་ཤོར་བས་མཚན་མོ་ཞིག་བུ་དེ་གྲོང་མི་མང་པོ་དང་ལྷན་དུ་མེ་མདའ་ཁུར་ནས་འཛིང་སར་སོང་བ་རེད། དཁྲུག་འཛིང་བྱེད་བཞིན་པའི་སྐབས་སྦུར་པ་((འབུ་སྒལ་པ་འཁྲེགས་པོ་ཞིག))ཞིག་འཕུར་ཡོང་ནས་བུ་དེའི་མགོ་བོར་ཤུགས་ཆེན་པོས་བརྡུང་པས། ཁོའི་བསམ་པར་དཱ་མེ་མདའ་ཕོག་སོང་དྲན་ནས་མགོ་བོ་རས་ཞིག་གིས་ཡག་པོ་བསྡམས་ནས་མི་ཚོར་མགོ་ལ་མེ་མདའ་ཕོག་སོང་ལབ་ནས་ལོག་ཡོང་བས་གྲོང་མི་ཚང་མ་ཧང་སངས་ནས་བལྟ་བར་སླེབས། མི་ཚང་མ་འཛོམས་སར་དེར་གཅིག་གིས་ཁོའི་མགོའི་རས་དེ་ག་ལེར་བཀྲོལ་བས་དེའི་ནང་སྦུར་པ་ཆེན་པོ་ཞིག་མ་གཏོགས་མགོ་བོར་རྨ་ཤུལ་གང་ཡང་མེད་པས་མི་ཚོ་གད་མོ་ཤོར་བ་དང༌། ཁོ་རང་ངོ་ཚ་པོ་བྱུང་བ་རེད།

༡༥༽ ཚངས་དབྱངས་ནས། སྤྱི་ལོ་ ༢༠༠༩ ཟླ་ ༦ ཚེས་ ༢༡ གི་ཆུ་ཚོད་ ༡༣ སྐར་མ་ ༠༥

དགོན་པའི་གྲྭ་རྒན་ཞིག་གིས། རྟག་ཏུ་དགེ་ཕྲུག་དེ་ལ་འཇིག་བརྟེན་མི་རྟག་པ་རེད། འཆི་བ་ནམ་ཡོང་ངེས་པ་མེད་ཟེར།རྒྱུན་པར། ཤ་དང་མར་རྣམས་བཟའ་མ་ནུས་པར། རང་གི་ཉལ་ཁྲིའི་འོག་ལ་སྦས། དགེ་ཕྲུག་དེར་ཐ་ན་རྩམ་པ་བགྲོད་པ་རྒྱག་པ་སྤྲོད་ཀྱི་མེད། ཉིན་ཞིག་དགེ་རྒན་དེ་ལ་ནད་གཅིག་བྱུང་ནས། མལ་ནང་ལྷུང་བས་ན། དགེ་ཕྲུག་དེ་ལ། ”ཁོ་རེ། ད་གྲ་སྒྲིག་བྱོས། འཆི་བ་སླེབས་ཡོང་གི་འདུག་ཟེར།” དགེ་ཕྲུག་དེས་ལམ་གསེང་ཤག་ནང་ཡར་རྒྱུག་མར་རྒྱུ་བྱས་ནས། རྡོག་མཁྲེགས་ཆེ་བ་གཅིག་དང་ཆུང་བ་གཅིག་བཟོས། དགེ་རྒན་གྱི་འགྲམ་ན་ཕྱིན་ནས། ”རྒན་ལགས་ཚང་མ་གྲ་སྒྲིག་ཡིན། འཆི་བ་སླེབས་སོང་ན། རྒན་ལགས་ཀྱིས། ཇ་དང་རྩམ་པ་དེ་ཡང་བ་ཡོད་སྟབས། དེ་དག་འཁུར་ནས་སྔོན་ལ་ཕེབས་རོགས། ངས་ཤ་དང་མར་དེ་ཁྱེར་ནས་རྗེས་ལ་སླེབས་ཡོང་ཟེར།”

རླང་འཁོར་ནང་དུ་དམར་ཧྲེང་འཛུལ་བ།

ནིའུ་ཡོག་ནང་བོད་པ་བརྡལ་གཏོང་རླངས་འཁོར་གཏོང་མཁན་ཞིག་ཡོད། ཉིན་གཅིག་རླངས་འཁོར་བཏང་ནས་འགྲོ་སྐབས། བུད་མེད་རྒྱག་པ། དམར་ཧྲེང་བ་ཞིག་གིས་མདུན་ལ་ཡོང་ནས། རླངས་འཁོར་དེ་བཀག ཁོ་མོས་རྒྱབ་ལ་འཛུལ་རྗེས། ”མགྱོགས་པོ་རྒྱུག མདུན་གྱི་རླངས་འཁོར་དེ་འདེད་ནས་རྒྱུག་ཟེར།” བོད་པ་དེས་རླངས་འཁོར་གང་ཙམ་བཏང་རྗེས། ཁོ་མོར་ལུས་ཀྱི་མགོ་ནས་རྐང་པ་བར་ཞིབ་ལྟ་ཞིག་བྱས། དེ་ལ་མོས། ”ངོ་ཚ་རྒྱུ་མེད་པ། ཁྱོད་བུད་མེད་དམར་ཧྲེང་བ་ལ་འདི་ལྟར་ལྟ་ནུས་པ་ངོ་མ་ཞབས་འདྲེན་རེད།” ཅེས་བཤད། ཁོས་མུ་མཐུད་རླངས་འཁོར་བཏང་། ཡང་། བར་མཚམས་ཞིག་ན། མོའི་ལུས་ཀྱི་སྨད་ལ་ཞིབ་ལྟ་ཞིག་བྱས་པར། མོ་ཁོང་ཁྲོ་ལངས་ནས། ”ཆལ་པོ། ངོ་ཚ་གི་མིན་འདུག་གམ། ཁྱོད་ཀྱི་བུད་མེད་མཐོང་མ་མྱོང་ངམ་”ཟེར། ཁོས། ”ཨ་ཅག་ལགས། དེ་འདྲ་ཁྱོན་ནས་མ་རེད། ཁྱེད་ཀྱིས་རླངས་འཁོར་གྱི་གླ་ཆ་དེ་ག་པར་ཉར་ཡོད་མེད་ལྟ་གི་ཡོད་ཟེར།”

ཚངས་དབྱངས་ནས་བྲིས་པ་འདིར་བཤུས།

མཚར་གཏམ། བོད་པ་དང་ཁ་ཆེ།

ཉིན་ཞིག་བོད་པ་ཞིག་དང་ཁ་ཆེ་གྲོགས་པོ་ཞིག་རི་ལི་ནང་ཐུག་པ་རེད། དེ་མ་ཐག་བོད་པ་དེས་ཁ་ཆེ་དེར་རྩེད་མོ་དང་སྦྲགས་ ཨ་ཁྱད་མཚར་། ཁྱེད་ཚོའི་ལྷ་དེ་དངོས་གནས་ཨ་ཆོག་ཐང་ཐང་ཡོད་ས་མ་རེད། ཁྱེད་ཚོས་ལྷ་ཁང་ཕྱི་ནང་ཚང་མར་སྐད་དེ་འདྲ་རྒྱབ་ན་ཡང་ཨ་ལེན་འདེབས་མཁན་མི་འདུག་ག། ལབ་པས། ཁ་ཆེ་དེ་ངོ་ཚོ་པོ་བྱུང་། དེ་ནས་གང་མཚམས་སོང་བ་ན་ཁ་ཆེ་དེས། ཨ་ཁྱད་མཚར། ཁྱེད་ཚོ་བོད་པའི་ལྷ་དེ་ཚོ་དངོས་གནས་མིག་ཡག་པོ་ཡོད་ས་མ་རེད། ཁྱེད་ཚོས་མཆོད་མེ་གཅིག་སྤར་ཡང་ད་དུང་མི་མཐོང་བར་གསུམ་བཞི་སྤར་དགོས་ཀྱི་འདུག་ག། ལབ་པས་བོད་པ་དེ་རེ་ཞིག་ཁ་སྐྱེངས་པོ་ཆགས་པ་རེད། གྲོགས་པོ་བང་སྨྱུག་གིས་བཤད།